Riviera Shqiptare është përfshirë në listën e destinacioneve evropiane të rekomanduara për turistët që kërkojnë temperatura më të buta dhe ditë me diell edhe gjatë muajve të dimrit.
Në një artikull të publikuar nga “Time Out”, autorët Anya Ryan dhe Liv Kelly rendisin 13 destinacione evropiane ku temperaturat mbeten relativisht të larta gjatë dhjetorit dhe janarit. Mes tyre është edhe bregdeti jugor i Shqipërisë, ku temperaturat mesatare arrijnë rreth 13°C në dhjetor dhe 14°C në janar.
Sipas artikullit, dimri në këto destinacione sjell jo vetëm mot më të butë, por edhe më pak turistë, më shumë qetësi dhe mundësi për të shijuar bregdetin larg fluksit të sezonit veror.
“Time Out” vëren se ardhja e dimrit nuk nënkupton domosdoshmërisht temperatura të ulëta në të gjithë Evropën. Në disa prej destinacioneve turistike, temperaturat mbeten mbi 10°C, duke krijuar kushte të përshtatshme për shëtitje dhe aktivitete në natyrë.
Në listën e publikuar përfshihen Ishujt Kanarie, Riviera e Budvës, Siçilia, Dubrovniku, Riviera Shqiptare, Madeira, Qipro, Malta, Rodos, Kadizi, Algarve, Costa del Sol dhe Lampedusa.
Riviera Shqiptare
Për bregdetin jugor të Shqipërisë, artikulli evidenton Sarandën dhe Himarën si dy prej zonave ku mund të shijohet më shumë qetësia gjatë muajve të dimrit.
Edhe pse temperaturat nuk janë të krahasueshme me ato të verës, klima relativisht e butë dhe numri më i ulët i vizitorëve e bëjnë Rivierën një alternativë për ata që kërkojnë disa ditë pranë detit edhe jashtë sezonit.
Një tjetër avantazh i përmendur janë çmimet. Gjatë dimrit, kur një pjesë e bizneseve mbyllen ose punojnë me orare të reduktuara, kostot e akomodimit dhe shërbimeve mund të jenë më të ulëta se në muajt e verës.
Me temperatura mesatare prej 13°C në dhjetor dhe 14°C në janar, Riviera Shqiptare renditet kështu mes destinacioneve evropiane ku dimri mund të shijohet në një klimë më të butë, larg turmave të sezonit të lartë.
