Pabarazia në të ardhurat e shqiptarëve është thelluar. Të dhënat e fundit të INSTAT tregojnë se rritja e të ardhurave mesatare është shoqëruar me një shpërndarje më të pabarabartë të tyre dhe zgjerim të hendekut mes shtresave ekonomike.
Sipas Anketës së të Ardhurave dhe Nivelit të Jetesës 2025, të ardhurat e 20% më të pasur të popullsisë ishin 4.83 herë më të larta se ato të 20% më të varfër. Në anketën e mëparshme, ky raport ishte 4.79 herë.
Përkeqësimi shfaqet edhe te koeficienti Gini, treguesi që mat pabarazinë në shpërndarjen e të ardhurave. Ai u rrit nga 29.83 në 30.37, me një zgjerim prej 0.54 pikësh. Sa më e lartë vlera e këtij treguesi, aq më e pabarabartë është shpërndarja e të ardhurave.
Hendeku është më i madh te popullsia nën 65 vjeç. Brenda kësaj grupmoshe, raporti mes të ardhurave të 20% më të pasur dhe 20% më të varfër arriti në 5.16 herë, nga 5.05 herë më parë. Te personat mbi 65 vjeç, raporti shënoi një ulje të lehtë, nga 3.53 në 3.52 herë.
Ndërkohë, të ardhurat mesatare mujore të disponueshme të ekuivalentuara arritën në 56,487 lekë, nga 51,122 lekë, duke u rritur me 10.5%. Ky tregues përllogaritet sipas madhësisë dhe përbërjes së familjes.
Rritja e mesatares është shoqëruar me një ulje të kufizuar të rrezikut të varfërisë. Ky tregues zbriti në 19%, nga 19.2% në anketën e mëparshme, ndërsa treguesit e pabarazisë u përkeqësuan.
Anketa e vitit 2025, e publikuar nga INSTAT, u referohet të ardhurave të realizuara gjatë vitit 2024.
