Qeveria e Maqedonisë së Veriut deklaron se furnizimi me karburante në vend mbetet i qëndrueshëm dhe se, pavarësisht rritjes së çmimeve në tregjet ndërkombëtare, karburantet në këtë vend vijojnë të jenë ndër më të lirat në rajon.
Ministrja e Energjetikës, Sanja Bozhinovska, bëri të ditur se inspektorët e tregut kanë zhvilluar më shumë se 300 kontrolle, gjatë të cilave është konstatuar se të gjithë tregtarët disponojnë rezervat ligjore operative për pesë ditë furnizim.
Sipas saj, edhe rezervat shtetërore janë në nivele të qëndrueshme dhe janë të mjaftueshme për të mbuluar rreth 62 ditë të nevojave të qytetarëve dhe të ekonomisë.
Bozhinovska theksoi se nëse presionet në tregjet globale vazhdojnë, qeveria do të përdorë të gjithë mekanizmat në dispozicion për mbrojtjen e standardit të qytetarëve. Ndër masat që mund të përdoren janë ulja e akcizës për karburantet deri në 4 denarë dhe ulja e TVSH-së për blerjen e produkteve.
Ministrja u ndal edhe te rregullorja e re për përcaktimin e çmimeve të karburanteve, sipas së cilës ndryshimet bëhen një herë në javë, çdo të hënë, dhe jo më sa herë që ka luhatje në bursat ndërkombëtare. Ajo deklaroi se deri tani është regjistruar vetëm një rritje.
Çmimet e karburanteve në vend përcaktohen nga Komisioni Rregullator i Energjisë dhe ministria nuk ndërhyn në këtë proces. Të hënën, komisioni vendosi rritjen mesatare të çmimeve me 14.27 për qind. Çmimi i naftës u rrit me 14.5 denarë, pasi çmimi i një fuçie në bursat ndërkombëtare kaloi nivelin e 100 dollarëve.
Komisioni Rregullator pritet të shpallë çmimet e reja të hënën, ndërsa në tregjet ndërkombëtare nafta ka kaluar sërish mbi 100 dollarë për fuçi gjatë dy ditëve të fundit, pasi më parë kishte rënë deri në rreth 85 dollarë për fuçi.
