Protestat dhe tensionet në vend nuk po reflektohen në dobësim të lekut. Përkundrazi, monedha shqiptare është forcuar sërish kundrejt euros, dollarit, paundit britanik dhe frangës zvicerane.
Sipas kursit zyrtar të Bankës së Shqipërisë për 20 tetorin, euro këmbehet me 90,77 lekë, nga 91,10 lekë një ditë më parë. Brenda një dite, monedha europiane ka humbur edhe 0,33 lekë.
Rënia nuk është kufizuar te euro. Dollari amerikan ka zbritur në 80,90 lekë, ndërsa paundi britanik në 107,98 lekë. Franga zvicerane kuotohet në 98,11 lekë, me një ulje ditore prej 0,46 lekësh.
Kështu, ndërsa protestat dhe përplasjet mbajnë të tensionuar jetën publike, tregu valutor po shfaq një tjetër pamje: valutat kryesore humbin terren përballë lekut.
Megjithatë, ky kontrast nuk do të thotë se tensionet janë pa pasoja ekonomike. Kursi i këmbimit nuk është matës i drejtpërdrejtë i situatës politike dhe lëvizja e tij, e vetme, nuk shpjegon arsyet e forcimit të monedhës shqiptare.
Për ata që marrin paga, pensione apo dërgesa familjare në euro, zhvillimi përkthehet në më pak lekë gjatë këmbimit. Në anën tjetër, nevojiten më pak lekë për të mbuluar të njëjtën pagesë në euro. /skyweb.al
