Çmimet e naftës në tregjet ndërkombëtare vijojnë të qëndrojnë në nivele të larta, me naftën bruto Brent që është ngjitur në rreth 110 dollarë për fuçi, niveli më i lartë i pesë muajve të fundit. Pasiguria për furnizimet energjetike, e nxitur nga lufta me Iranin dhe rreziku i sulmeve të reja në Ngushticën e Hormuzit, po shton presionin mbi tregjet.
Edhe nafta amerikane WTI ka kaluar mbi 104 dollarë për fuçi për kontratat me dorëzim muajin e ardhshëm. Pavarësisht rikuperimit të flukseve të naftës bruto nga Gjiri Persik në rreth 80% të nivelit të para luftës, furnizimi me produkte të rafinuara mbetet i kufizuar, duke vështirësuar stabilizimin e tregut.
Një tjetër faktor që po ndikon në shtrenjtimin e energjisë janë kostot rekord të transportit detar. Shtetet e Bashkuara po shqyrtojnë mundësinë e lejimit të shitjes së cisternave të sanksionuara, me synimin për të rritur kapacitetet e transportit dhe për të ulur kostot e dërgesave. Megjithatë, ndikimi i mundshëm i kësaj mase në çmimet e tregut mbetet ende i paqartë.
Tensionet po reflektohen edhe në tregun e gazit. Çmimet e gazit natyror të lëngshëm në Azi kanë arritur nivelin më të lartë që nga dhjetori i vitit 2022, ndërsa në Europë ato qëndrojnë pranë niveleve më të larta të viteve të fundit. Shqetësimet për sigurinë e transportit detar u shtuan pas raportimeve për një sulm ndaj një cisterne gazi të lëngshëm pranë brigjeve të Jemenit.
Në këtë klimë pasigurie, tregjet financiare kanë shfaqur gjithashtu shenja dobësimi. Bursat europiane e nisën të martën me rënie të lehta, pas humbjeve të regjistruara një ditë më parë. Në Azi, presioni ishte më i dukshëm te aksionet e kompanive të teknologjisë, ku investitorët po vlerësojnë kostot e larta të investimeve në inteligjencën artificiale dhe pritshmëritë për kthimin e tyre financiar.
