Presidenti i SHBA-së, Donald Trump, nënshkroi të hënën një urdhër ekzekutiv që rekomandon uljen e numrit të sëmundjeve të mbuluara nga rekomandimet universale për vaksinimin rutinë të fëmijëve, nga 18 në 11.
Vendime të tilla mund të krijojnë boshllëqe në imunizim, duke i lënë popullatat të ekspozuara ndaj shpërthimeve të sëmundjeve dhe duke nxitur mosbesimin ndaj vaksinave, tha për Euronews Marco Cavaleri, drejtuesi i Departamentit për Kërcënimet ndaj Shëndetit Publik në Agjencinë Evropiane të Barnave (EMA).
Shmangia e vaksinimeve rutinë të fëmijërisë mund të jetë “katastrofike”, tha ai, duke shtuar se kjo rrezikon “rikthimin e sëmundjeve që kemi qenë në gjendje t’i kontrollojmë dhe t’i eliminojmë nga vendet tona”.
Për më tepër, një qasje e tillë mund të dëmtojë besimin e shoqërisë tek vaksinat. Vendime të tilla, si ai i marrë në SHBA, “fatkeqësisht mund të jenë shumë të dëmshme për besimin te vaksinat”, paralajmëroi Cavaleri.
Urdhri i Trump parashikon që rekomandimet për vaksinat kundër COVID-19, gripit, rotavirusit, sëmundjes meningokokale, RSV-së dhe hepatitit A dhe B të mos jenë më pjesë e vaksinimit universal rutinë. Disa prej këtyre vaksinave do të vazhdojnë të rekomandohen për fëmijët që konsiderohen me rrezik më të lartë, ndërsa për të tjerat do të zbatohet një qasje e bazuar në “vendimmarrjen e përbashkët klinike” mes prindërve dhe ofruesve të kujdesit shëndetësor.
Urdhri rekomandon gjithashtu ndarjen e vaksinës MMR, e cila mbron nga fruthi, shytat dhe rubeola, në tri vaksina të veçanta dhe administrimin e tyre në vizita të ndryshme. Aktualisht, vaksinat e veçanta kundër fruthit, shytave dhe rubeolës nuk janë të disponueshme në SHBA.
Ky vendim vjen në një kohë kur Sekretari amerikan i Shëndetësisë, Robert F. Kennedy Jr., ka vënë në pikëpyetje sigurinë e vaksinave dhe ka promovuar pretendime që i lidhin vaksinat me autizmin, pavarësisht provave të shumta shkencore që nuk kanë gjetur asnjë lidhje shkakësore mes vaksinimit dhe autizmit.
“Provat aktuale janë të padiskutueshme: vaksinat, përfshirë vaksinën MMR, janë të sigurta dhe nuk shkaktojnë autizëm”, tha të mërkurën drejtori i Përgjithshëm i Organizatës Botërore të Shëndetësisë (OBSH), Tedros Adhanom Ghebreyesus.
