Sipas raportit të FAO-s, Indeksi i Çmimeve të Ushqimeve arriti në 128.5 pikë, duke u rritur me 2.4% krahasuar me shkurtin dhe me 1.0% në raport me të njëjtën periudhë të një viti më parë. Kjo rritje konfirmon një trend të ri në tregjet globale, pas një periudhe relativisht të qëndrueshme, raporton skyweb.al.
Shtysën kryesore e dhanë vajrat bimore dhe sheqeri, të cilat shënuan rritjet më të forta, përkatësisht me 5.1% dhe 7.2%. Ndërkohë, edhe drithërat regjistruan rritje me 1.5%, të nxitura kryesisht nga çmimet më të larta të grurit në tregjet ndërkombëtare.
Në të njëjtën linjë, çmimet e mishit u rritën me 1.0%, ndërsa orizi shënoi rënie me 3.0%, duke qenë i vetmi komponent që uli presionin në indeksin total.
FAO thekson se rritja e çmimeve të energjisë dhe plehrave po ndikon drejtpërdrejt në kostot e prodhimit bujqësor, duke e bërë më të shtrenjtë gjithë zinxhirin e furnizimit me ushqime.
Sipas kryeekonomistit të FAO-s, Maximo Torero, nëse konflikti në Lindjen e Mesme zgjat përtej 40 ditëve, fermerët mund të detyrohen të ulin përdorimin e inputeve, të mbjellin më pak ose të kalojnë në kultura më pak intensive.
Këto zhvillime pritet të ndikojnë drejtpërdrejt në prodhimin bujqësor dhe furnizimin global me ushqime, duke ushtruar presion të mëtejshëm mbi çmimet gjatë pjesës së mbetur të vitit./skyweb.al
BURIMI: https://www.fao.org/worldfoodsituation/foodpricesindex/en/
