Qeveria ka parashikuar një paketë të re fiskale për periudhën 2026–2029, e cila synon të lehtësojë barrën tatimore të sipërmarrjeve dhe të rrisë të ardhurat përmes formalizimit.
Në kuadër të kësaj pakete, detyrimet tatimore të akumuluara më shumë se 10 vite më parë do të falen, ndërsa për borxhet e 10 viteve të fundit do të zbatohet një skemë ripagimi me përqindje të reduktuara.
Kjo nismë, e quajtur “Paqja Fiskale”, synon të shënojë një kapitull të ri bashkëpunimi mes administratës tatimore dhe bizneseve, duke ofruar marrëveshje disa vjeçare që shmangin kontrollet dhe përmirësojnë klimën e të bërit biznes.
Në të njëjtën kohë, ajo do të garantojë mbledhjen e rregullt të detyrimeve tatimore.
Në programin e saj qeverisës, ekzekutivi parashikon që deri në vitin 2029 të vijojë politika e taksës 0% për bizneset e vogla, si dhe të hyjë në fuqi reforma e taksës mbi pasuritë e paluajtshme.
Ky ndryshim do të bazohet në rivlerësimin masiv të pronave, përcaktimin e çmimeve reale të tregut dhe ngritjen e Kadastrës Fiskale.
Sipas qeverisë, të ardhurat tatimore pritet të rriten me mbi 30 miliardë lekë në vit, jo përmes rritjes së barrës fiskale, por përmes zgjerimit të bazës tatimore, digjitalizimit të shërbimeve dhe luftës kundër informalitetit.
Një rol të veçantë pritet të ketë inteligjenca artificiale, e cila do të aplikohet në sistemet tatimore dhe doganore për të identifikuar anomalitë në kohë reale, duke shtuar transparencën, ulur evazionin dhe përshpejtuar procedurat për bizneset dhe qytetarët./skyweb.al
