Të martën, çmimi i arit arriti për herë të parë në histori në 4,000 dollarë për onz, i nxitur nga kërkesa e fortë për investime në këtë metal të çmuar në një kohë pasigurie të theksuar ekonomike dhe gjeopolitike, si dhe pritshmëritë për ulje të mëtejshme të normave të interesit nga Rezerva Federale Amerikane.
Ari është rritur me 51% që nga fillimi i këtij viti, i mbështetur nga blerjet masive të bankave qendrore, kërkesa në rritje për fondet e tregtuara në bursë të mbështetura me ar (ETF), një dollar më i dobët dhe interesimi i shtuar nga investitorët e vegjël që kërkojnë të mbrohen nga pasiguritë në tregjet globale dhe tensionet tregtare e gjeopolitike. Në tremujorin e parë të vitit, ari shënoi kthimin më të fortë që nga viti 1986.
Ari priret të performojë mirë në një ambient me norma të ulëta interesi dhe gjatë periudhave të pasigurisë ekonomike. Ai shihet si një investim i qëndrueshëm dhe një mbrojtje ndaj inflacionit, pasi investitorët besojnë se ai ruan vlerën në kohë krizash dhe kur çmimet rriten.
Ndërkohë, mbyllja e qeverisë amerikane ka lënë tregtarët dhe politikëbërësit pa të dhëna zyrtare, përfshirë raportin mujor të vendeve të punës. Të dhënat kryesore mbi inflacionin për muajin shtator pritet të publikohen javën që vjen. Kjo ka detyruar investitorët të mbështeten në të dhëna sekondare, jozyrtare, për të vlerësuar kohën dhe përmasën e pritshme të uljeve të normave nga Fed. Tregjet aktualisht presin një ulje me 0.25 pikë përqindje në takimin e Fed më 28-29 tetor dhe një tjetër në dhjetor.
“Pres që ari të arrijë në 4,300 dollarë për onz gjatë gjashtë muajve të ardhshëm, pasi pritet që dollari amerikan të vazhdojë të dobësohet”, u shpreh Michael Langford, drejtues i investimeve në Scorpion.
Ndërkohë, investitori miliarder Ken Griffin deklaroi të hënën se zhvillimi i arit si një aset më i sigurt se dollari është jashtëzakonisht shqetësues.
“Po shohim inflacion të ndjeshëm të aseteve larg dollarit, teksa njerëzit po kërkojnë mënyra për të shmangur varësinë nga dollari dhe rrezikun e sovranitetit amerikan në portofolët e tyre,” tha ai në një intervistë për Bloomberg.
Banka Goldman Sachs, gjithashtu, rriti parashikimin e saj për çmimin e arit për dhjetorin 2026 në 4,900 dollarë për ons, nga 4,300 më parë.
Sipas të dhënave të Bankës Popullore të Kinës, banka qendrore kineze shtoi rezervat e arit në shtator për muajin e 11-të me radhë. /Skyweb.al
