Koha kur pasagjerët përpiqeshin me ngut të gjenin kartën e imbarkimit apo bënin check-in në momentin e fundit, pritet të bëhet një kujtim i largët.
Organizata Ndërkombëtare e Aviacionit Civil (ICAO), që vepron në kuadër të Kombeve të Bashkuara dhe përcakton politikat globale të aviacionit, po përgatit ndryshime thelbësore në mënyrën si udhëtohet me avion. Iniciativa më e fundit parashikon futjen e një “dokumenti dixhital udhëtimi” që do të zëvendësojë dokumentet fizike.
Sipas Times, kjo teknologji mund të bëhet realitet brenda tre viteve, duke lejuar pasagjerët të ruajnë në telefonin e tyre inteligjent pasaportën dhe të gjitha informacionet e nevojshme për udhëtim.
Aktualisht, udhëtarët janë të detyruar të bëjnë check-in në internet ose në aeroport, për të marrë një kartë imbarkimi me barkod që skanohet disa herë përgjatë procesit të udhëtimit. Por me sistemin e ri, kjo procedurë do të thjeshtohet ndjeshëm: pas rezervimit të biletës, pasagjerët do të shkarkojnë në telefon një “kartë udhëtimi” që do të përditësohet automatikisht në rast ndryshimesh në itinerar.
Për më tepër, udhëtarët do të kenë mundësinë të ngarkojnë të dhënat e pasaportës në pajisjen e tyre dhe të kalojnë nëpër të gjitha pikat e sigurisë në aeroport duke përdorur teknologjinë e njohjes së fytyrës – pa asnjë ndërhyrje manuale. Në momentin që fytyra e udhëtarit skanohet, linjat ajrore do të informohen menjëherë për mbërritjen e tij në aeroport.
Ky sistem i ri pritet të sjellë një revolucion në mënyrën e udhëtimit ajror – duke e bërë atë më të shpejtë, më të sigurt dhe më komod për të gjithë pasagjerët, njëkohësisht duke forcuar masat e sigurisë në aeroportet ndërkombëtare. /skyweb.al
