Vietnami ka nisur mbylljen e mbi 86 milionë llogarive bankare që nuk kanë përmbushur verifikimin e detyrueshëm biometrik, një nga ndërhyrjet më të mëdha financiare në shkallë botërore.
Sipas rregullave të reja, çdo përdorues duhet të paraqitet fizikisht në bankë për të bërë identifikimin përmes skanimit të fytyrës, sidomos kur kryen transferta me vlera të mëdha. Banka Shtetërore e Vietnamit deklaron se masa synon të frenojë mashtrimet digjitale dhe pastrimin e parave, që po shtohen për shkak të përdorimit të inteligjencës artificiale.
Por mënyra e menjëhershme e zbatimit ka shkaktuar kaos. Mijëra qytetarë, të huaj dhe mbajtës llogarish joaktive kanë humbur përkohësisht qasjen në fondet e tyre, pasi sistemi nuk ofron asnjë mënyrë verifikimi në distancë.
Vendimi ka ndezur debat kombëtar mbi balancën mes sigurisë financiare dhe aksesit në shërbimet bazë bankare, në një vend ku shumë njerëz ende nuk kanë mundësi teknologjike për t’u përfshirë në sistemin digjital financiar. /skyweb.al
