Biznesmeni Behgjet Pacolli ka hedhur poshtë kontratën e pretenduar për shitjen e 47% të aksioneve në Aeroportin Ndërkombëtar të Vlorës. Përmes një postimi në rrjetet sociale, ai ka akuzuar noteren Valbona Selimi për mashtrim dhe veprime të kundraligjshme, duke përfshirë edhe ish-administratorin e kompanisë, Valon Lluka.
Pacolli shkruan se as ai, as ndonjë përfaqësues i autorizuar i kompanisë MABCO Construction SA, nuk kanë qenë asnjëherë në zyrën e noterës Selimi, nuk kanë komunikuar me të dhe nuk kanë nënshkruar asnjë dokument në praninë e saj.
“Në vijim, theksoj se ky akt noterial përbën një element themelor të veprimtarisë së dyshuar të kundërligjshme të ndërmarrë nga z. Valon Lluka @ co., me të cilin, në fillim të muajit prill, ka tentuar te realizoi transferimin e 47% të aksioneve, duke e mbajtur atë të fshehur deri në momentin kur është zbuluar rastësisht kater muaj me vone 18 gusht 25, në dokumentacionin e ish–administratorit të shoqërisë VIA”, shprehet Pacolli.
Ai përshkruan një akt noterial të vitit 2023, që noterja ka përdorur në mënyrë joligjore si bazë për transferimin e aksioneve, ku pretendimet e saj për praninë dhe nënshkrimin e tij janë tërësisht të pavërteta.
Kujtojmë se ky incident është cilësuar si fillimi i një veprimtarie të dyshuar dhe kundërligjore që po krijon tensione në menaxhimin e aksioneve të aeroportit të Vlorës.
/Skyweb.al
