Shëndeti i gojës mund të jetë shumë më i rëndësishëm sesa mendohej deri më sot. Sipas studimeve të fundit, shkencëtarët po zbulojnë se bakteret që grumbullohen në mishrat e sëmurë të dhëmbëve mund të lidhen me zhvillimin e sëmundjeve kronike në pjesë të ndryshme të trupit, sipas Wall Street Journal.
Ekspertët po hetojnë mënyrën se si infeksionet e gojës dhe inflamacioni që ato shkaktojnë mund të ndikojnë në rritjen e rrezikut për sëmundje të zemrës, diabet, rënie të aftësive njohëse, artrit, sëmundje të frymëmarrjes dhe sëmundje kronike të mëlçisë.
Sipas studiuesve, bakteret nga mishrat e infektuar mund të hyjnë në qarkullimin e gjakut dhe të nxisin inflamacion në organe të tjera. Ky proces mund të luajë një rol të rëndësishëm në zhvillimin ose përkeqësimin e disa prej sëmundjeve më të zakonshme që lidhen me plakjen.
Për këtë arsye, gjithnjë e më shumë specialistë po kërkojnë që kujdesi për shëndetin oral të mos shihet vetëm si çështje e dhëmbëve, por si pjesë e rëndësishme e parandalimit të sëmundjeve në të gjithë organizmin.
Mjekët rekomandojnë larjen e dhëmbëve dy herë në ditë, përdorimin e fillit dentar, kontrolle të rregullta te dentisti dhe trajtimin në kohë të sëmundjeve të mishrave të dhëmbëve, si masa që mund të ndihmojnë jo vetëm në ruajtjen e shëndetit të gojës, por edhe të organizmit në tërësi.
Shkencëtarët theksojnë se kërkimet vazhdojnë, por provat po bëhen gjithnjë e më bindëse se goja mund të jetë një tregues i rëndësishëm i shëndetit dhe jetëgjatësisë së njeriut. /skyweb.al
