Prokuroria e Posaçme ka zhvilluar kontrolle në ambientet e Bashkisë së Tiranës, në kuadër të hetimeve për dosjen e njohur si “Veliaj 2”.
Burime pranë hetimit bëjnë me dije se hetuesit e SPAK kanë sekuestruar një sërë dokumentesh dhe praktikash administrative, të cilat do të analizohen në vijim nga prokurorët e çështjes.
Mes materialeve të marra mësohet se ndodhen dokumente që lidhen me udhëtimet zyrtare të kryebashkiakut Erion Veliaj, si dhe me shpenzimet dhe dietat e përfituara gjatë këtyre lëvizjeve.
Dokumentacioni është kërkuar për t’u administruar si provë në dosjen hetimore, ndërsa ende nuk janë bërë publike detaje mbi periudhën konkrete që mbulojnë praktikat e sekuestruara.
Kontrollet janë pjesë e veprimeve të mëtejshme hetimore që SPAK po kryen për zbardhjen e plotë të rrethanave të çështjes “Veliaj 2”.
Hetimet vijojnë, ndërsa pritet që verifikimi i dokumenteve të sekuestruara të përcaktojë edhe hapat e mëtejshëm të organit të posaçëm të akuzës. /skyweb.al
