Numri i aksidenteve rrugore në vend ka shënuar rënie gjatë muajit shtator 2025, krahasuar me të njëjtën periudhë të vitit të kaluar. Sipas të dhënave paraprake të publikuara nga Instituti i Statistikave (INSTAT), gjatë këtij muaji janë regjistruar 102 aksidente rrugore, me 135 persona të aksidentuar, përfshirë të vrarë dhe të plagosur.
Në total, gjatë periudhës janar–shtator 2025, numri i aksidenteve rrugore është ulur me 16.3% në raport me të njëjtën periudhë të vitit 2024. INSTAT thekson se të dhënat janë paraprake dhe mund t’i nënshtrohen përditësimeve të mëvonshme.
Shkaku kryesor i aksidenteve vijon të mbetet sjellja e drejtuesve të mjeteve, që përbën 91.2% të rasteve. Grupmosha 25–34 vjeç rezulton më problematikja, duke shkaktuar 26.5% të aksidenteve të ndodhura në këtë periudhë.
Sa i përket ditëve të javës, e hëna ka rezultuar më e rrezikshmja, me 19.6% të aksidenteve, ndërsa e mërkura, e enjtja dhe e premtja kanë regjistruar nga 9.8% secila – përqindjet më të ulëta.
Pjesa më e madhe e aksidenteve janë regjistruar gjatë orareve 14:00–17:00 dhe 19:00–24:00, duke përbërë secila 23.5% të totalit. /Skyweb.al
