Grupi hungarez 4iG, ka nisur përgatitjet për listimin e aksioneve në bursën amerikane Nasdaq. Objektivi është që procesi të përfundojë gjatë tremujorit të fundit të vitit 2027.
Bordi i Drejtorëve ka miratuar nisjen e procedurave për hyrjen në tregun amerikan të kapitalit, por listimi nuk konsiderohet ende i sigurt. Struktura e operacionit, afatet dhe mundësia e emetimit të aksioneve të reja do të vendosen pas përfundimit të analizave financiare dhe ligjore.
Për përgatitjen e listimit, 4iG do të angazhojë banka investimi amerikane, studio ligjore, kompani ndërkombëtare auditimi dhe këshilltarë të tregjeve të kapitalit. I gjithë grupi do t’i nënshtrohet një procesi verifikimi, ndërsa raportimi financiar, kontrollet e brendshme dhe qeverisja e korporatës duhet të përshtaten me kërkesat e tregut amerikan.
Sipas njoftimit zyrtar të 4iG, synimi është zgjerimi i bazës së investitorëve ndërkombëtarë, rritja e likuiditetit të aksioneve dhe sigurimi i burimeve të reja financimi për investimet e grupit.
Kompania po zgjerohet në sektorë që kërkojnë kapital të lartë, si telekomunikacioni, infrastruktura digjitale, industria hapësinore dhe e mbrojtjes, si dhe energjia. Listimi në Nasdaq do të ishte pjesë e së njëjtës strategji me emetimin ndërkombëtar të obligacioneve që grupi ka nisur të përgatisë.
“Nasdaq nuk është një qëllim në vetvete, por hapi i radhës në strategjinë ndërkombëtare të rritjes dhe të tregjeve të kapitalit”, deklaroi kryetari dhe drejtori ekzekutiv i 4iG, Gellért Jászai.
Grupi 4iG pritet të bëhet kompania e parë hungareze me aksione të tregtuara në Nasdaq.
4iG është aktualisht e listuar në Bursën e Budapestit dhe ka më shumë se 11 mijë punonjës. Në gjashtëmujorin e parë të vitit 2026, të ardhurat e grupit arritën në 409.4 miliardë forinta, me rritje vjetore prej 16.7%. EBITDA arriti në 126.3 miliardë forinta, ndërsa fitimi pas taksave ishte 21.9 miliardë forinta, sipas raportit financiar për gjashtëmujorin.
Në Shqipëri, grupi kontrollon ONE Albania, operatorin e krijuar nga bashkimi i ALBtelecom dhe ONE Telecommunications. /skyweb.al
