YouTube ka njoftuar një risi që do të gëzojë shumë përdorues dhe krijues përmbajtjesh. Platforma ka nisur të përdorë inteligjencën artificiale për të përmirësuar cilësinë e videove të vjetra, të ngarkuara vite më parë në rezolucione të ulëta. Kjo veçori e re quhet “Super Resolution” dhe ka për qëllim të transformojë videot që dikur ishin në 240p ose 360p, duke i përmirësuar automatikisht deri në 1080p, ndërsa në të ardhmen synohet që procesi të arrijë edhe në 4K.
Sipas të dhënave të publikuara nga YouTube, sistemi funksionon në mënyrë që të mos preket materiali origjinal. Kjo do të thotë se krijuesit dhe përdoruesit mund të zgjedhin nëse duan të shohin versionin e përmirësuar me inteligjencë artificiale apo atë origjinal, pa pasur humbje të të dhënave. Gjithashtu, krijuesit kanë mundësinë ta çaktivizojnë përmirësimin nëse preferojnë që videot e tyre të mbeten në gjendjen e parë.
Kur një video përmirësohet nga sistemi, në cilësimet e shikimit do të shfaqet etiketa “Super resolution”, që njofton përdoruesin se po sheh një version të përpunuar nga inteligjenca artificiale. Ky përmirësim pritet të ketë ndikim të madh tek videot e ngarkuara në fillimet e YouTube, duke sjellë një përvojë shumë më të qartë për shikuesit në ekranet moderne, të cilat kërkojnë cilësi më të lartë imazhi.
Risia shihet si një hap i rëndësishëm drejt ruajtjes dhe modernizimit të përmbajtjes dixhitale, pasi shumë video historike, muzikore apo kulturore, të ngarkuara në vitet e para të platformës, mund të fitojnë një jetë të re në epokën e rezolucioneve të larta. Megjithatë, ekspertët paralajmërojnë se niveli i përmirësimit mund të ndryshojë në varësi të cilësisë origjinale të videos, pasi në disa raste, procesi i “rindërtimit” të detajeve nga AI mund të sjellë efekte vizuale të papritura.
Në çdo rast, kjo nismë e YouTube tregon se kompania po investon seriozisht në teknologjitë e inteligjencës artificiale, jo vetëm për të krijuar përmbajtje të re, por edhe për të përmirësuar trashëgiminë digjitale të dekadës së kaluar. Super Resolution pritet të jetë një prej risive më të rëndësishme të platformës për vitin 2025, duke ofruar një kombinim mes nostalgjisë dhe inovacionit teknologjik. /Skyweb.al
