Sipas të dhënave të fundit nga Autoriteti i Mbikëqyrjes Financiare kompanitë e sigurimeve kanë arkëtuar 1.5 miliardë lekë nga primet e shkruara bruto të Kartonit Jeshil deri në shtator 2025. Kjo shënon një rritje prej 11%krahasuar me të njëjtën periudhë të një viti më parë.
Sigurimi me Karton Jeshil është i detyrueshëm për të gjitha automjetet shqiptare që udhëtojnë jashtë vendit dhe mbulon dëmet që u shkaktohen palëve të treta në rast aksidenti.
Këtë vit, skema ka pësuar ndryshime të rëndësishme që kanë lehtësuar ndjeshëm kostot për drejtuesit e automjeteve.
Që nga 1 shkurti 2025, drejtuesit e makinave që udhëtojnë drejt Malit të Zi përfitojnë zbritje të çmimit nga 400 euro në vetëm 50 euro në vit.
Ndërkohë, që nga 1 prilli, qytetarët shqiptarë mund të udhëtojnë drejt Maqedonisë së Veriut me policën vjetore të Kartonit Jeshil, gjithashtu me tarifë të reduktuar prej 50 eurosh.
Pavarësisht uljes së ndjeshme të çmimeve, të ardhurat e kompanive të sigurimit nuk janë prekur, për shkak të shtimit të numrit të kontratave. Statistikat tregojnë një rritje me 2.5% të kontratave të reja për këtë produkt, duke reflektuar rritjen e interesit të qytetarëve për të udhëtuar jashtë vendit me automjetet e tyre.
Ekspertët e tregut e lidhin këtë ecuri me liberalizimin rajonal të sigurimeve dhe rregullat e reja për lëvizjen e lirë në Ballkan, që pritet të nxisin më tej qarkullimin e automjeteve dhe konkurrencën mes kompanive të sigurimit. /skyweb.al
