Kryebashkiaku i pezulluar i Tiranës, Erion Veliaj, është paraqitur sot në Gjykatën Kushtetuese pasi kërkon shfuqizimin e vendimit për shkarkimin e tij nga detyra.
Ai u transferua nga paraburgimi i Durrësit në ambientet e gjykatës nën masa sigurie, për të qenë i pranishëm në seancën publike ku kërkon rikthimin në detyrë dhe anulimin e zgjedhjeve të parakohshme në Bashkinë e Tiranës.
Veliaj ka këmbëngulur të marrë pjesë vetë në seancë, duke kërkuar që të japë shpjegime përpara trupës gjykuese dhe të mbrojë pozicionin e tij si kryebashkiak i zgjedhur.
Ndërkohë, në të njëjtën ditë, zëvendëskryeministrja dhe ministrja e Infrastrukturës, Belinda Balluku, është thirrur në SPAK në orën 15:00 për t’u marrë në pyetje nga prokurori i posaçëm Dritan Prençi, në lidhje me procedurat e tenderit për mbikëqyrjen e punimeve të tunelit të Llogarasë.
Provat e reja të siguruara nga telefoni i ish-drejtorit të ARRSH, Arben Berberi, përmbajnë komunikime që lidhen me procesin e tenderimit dhe janë bërë pjesë e dosjes hetimore që po shqyrton SPAK.
Kështu, në të njëjtën ditë, dy figura kryesore të mazhorancës, rivalë të hershëm për trashëgiminë pas Ramës, përballen në institucione të ndryshme të drejtësisë: Veliaj përpara Gjykatës Kushtetuese dhe Balluku përpara Prokurorisë së Posaçme, në dy çështje të ndara, por me rëndësi të lartë politike dhe institucionale. /skyweb.al
