Autoritetet shëndetësore në Britani po hetojnë një grup infeksionesh meningokoksike, ku janë shënuar edhe dy viktima. Rasti ka rikthyer vëmendjen te meningokoku i grupit B (MenB), një infeksion i rrallë, por shumë i rrezikshëm, që prek veçanërisht adoleshentët dhe të rinjtë.
Sipas të dhënave, në zonën e Kent janë konfirmuar 15 raste dhe 12 të tjera janë nën hetim, duke e çuar totalin në 27. Shumë prej tyre lidhen me ekspozim në një klub nate, çka shpjegon përhapjen e shpejtë.
Ekspertja e CNN, Leana Wen, shpjegon se kjo sëmundje shkaktohet nga bakteri Neisseria meningitidis dhe mund të çojë në meningjit (infeksion i trurit dhe palcës kurrizore) ose në infeksion të gjakut (septicemi). Edhe pse e rrallë, ajo mund të përkeqësohet shumë shpejt dhe të bëhet kërcënuese për jetën brenda pak orësh.
Autoritetet theksojnë se bëhet fjalë për një shpërthim të lokalizuar dhe rreziku për publikun e gjerë mbetet i ulët. Megjithatë, situata tregon se infeksione të tilla mund të përhapen në ambiente me kontakt të afërt.
Sëmundja përhapet përmes sekrecioneve të rrugëve të frymëmarrjes, si puthjet apo ndarja e gotave dhe enëve. Nuk transmetohet nga kontaktet e rastësishme. Më të rrezikuar janë foshnjat, të rinjtë dhe të moshuarit mbi 65 vjeç, si dhe personat me sistem imunitar të dobët.
Simptomat fillestare përfshijnë temperaturë, dhimbje koke, lodhje, të vjella dhe dhimbje muskujsh, por mund të ngatërrohen lehtësisht me viroza. Sëmundja mund të përkeqësohet shpejt, duke shkaktuar ngurtësim të qafës, ndjeshmëri ndaj dritës, konfuzion, kriza dhe në disa raste një skuqje të lëkurës që nuk zhduket me shtypje.
Ekspertët theksojnë rëndësinë e ndërhyrjes së shpejtë mjekësore, pasi sëmundja mund të jetë fatale në 8% deri në 15% të rasteve dhe të lërë pasoja afatgjata tek të mbijetuarit.
