Ndërsa ndryshimet klimatike po shkaktojnë valë të nxehti më të shpeshta dhe më intensive, një studim i ri lidh rritjen e temperaturave me përkeqësimin e shëndetit mendor te fëmijët dhe të rinjtë.
Një studim i ri ka zbuluar se shtrimet në spital për probleme të shëndetit mendor te fëmijët dhe të rinjtë rriten gjatë periudhave me temperatura të larta. Autorët paralajmërojnë se, ndërsa temperaturat globale po rriten me një ritëm gjithnjë e më të shpejtë, ndikimi i tyre në shëndet pritet të bëhet edhe më i madh. Sipas studimit të kryer nga Universiteti i Sidneit në Australi, nxehtësia ekstreme rrit rrezikun për një sërë çrregullimesh të shëndetit mendor, duke përfshirë abuzimin me substanca, depresionin, ankthin, çrregullimin obsesiv-kompulsiv (OCD) dhe çrregullimet e sjelljes.
“Moti më i nxehtë se normalja, i cili po bëhet gjithnjë e më i shpeshtë për shkak të ndryshimeve klimatike, tashmë po ndikon në shëndetin mendor të disa prej të rinjve tanë më të cenueshëm,” tha autori kryesor i studimit, Wen-Qiang He.
Sipas Organizatës Botërore të Shëndetësisë (OBSH), një në shtatë të rinj të moshës 10–19 vjeç në mbarë botën përjeton një çrregullim të shëndetit mendor, duke përbërë 15% të barrës globale të sëmundjeve për këtë grupmoshë. Wen-Qiang He paralajmëroi se kjo barrë pritet të përkeqësohet si pasojë e ndryshimeve klimatike, duke theksuar se shëndeti mendor po bëhet një element gjithnjë e më i rëndësishëm në planifikimin e përshtatjes ndaj klimës dhe të politikave të shëndetit publik.
Sipas parashikimeve, në periudhën 2090–2099, shtrimet në spital të lidhura me nxehtësinë pritet të rriten me 6.0% deri në 7.7% në një skenar me emetime të ulëta ose mesatare të gazeve serrë, ndërsa në një skenar me emetime të larta ato mund të rriten deri në 20.8%.
Studiuesit analizuan të dhënat për të gjitha shtrimet në spital për probleme të shëndetit mendor te fëmijët deri në 12 vjeç dhe adoleshentët nga 13 deri në 17 vjeç në shtetin e Uellsit të Ri Jugor (New South Wales), shteti më i populluar i Australisë, gjatë periudhës 2001–2022.
Rezultatet treguan se numri i shtrimeve në spital rritej në ditët më të nxehta, veçanërisht gjatë stinës së ftohtë.
Edhe pse arsyeja e saktë e rritjes së vizitave për probleme të shëndetit mendor mbetet ende e paqartë, studiuesit sugjerojnë se ndryshimet e papritura të temperaturës mund të ndikojnë në reagimet ndaj stresit, cilësinë e gjumit dhe gjendjen emocionale. /skyweb.al
