Tregu i automjeteve ka nisur vitin 2026 me ritëm të lartë, teksa mesatarisht rreth 230 mjete regjistrohen çdo ditë për herë të parë në Shqipëri. Sipas të dhënave zyrtare të Drejtorisë së Përgjithshme të Shërbimeve të Transportit Rrugor, gjatë muajit janar janë regjistruar 6,895 mjete, me një rritje prej 4 për qind krahasuar me të njëjtën periudhë të vitit 2024.
Nga totali i regjistrimeve, 5,673 janë autovetura, ndërsa në total janë përfshirë 26 kategori mjetesh dhe 221 marka të ndryshme, çka tregon një shumëllojshmëri të lartë ofertash në tregun vendas.
Struktura e blerjeve konfirmon dominimin e mjeteve të përdorura të importuara. Sipas të dhënave, 4,389 mjete janë të përdorura dhe të blera jashtë Shqipërisë, ndërsa 1,037 janë mjete të reja. Vetëm në kategorinë e autoveturave, 5,140 njësi janë regjistruar gjatë janarit, ku 3,545 janë të përdorura të importuara dhe 392 janë mjete të reja të blera jashtë vendit.
Tirana kryeson bindshëm për numrin e regjistrimeve, me 2,771 mjete në total gjatë janarit. Nga këto, 1,633 janë mjete të përdorura dhe 636 janë mjete të reja të blera jashtë vendit. Pas saj renditet Durrësi me 1,075 mjete të regjistruara.
Sa i përket origjinës së mjeteve, në krye qëndron Koreja e Jugut me 1,747 mjete të importuara, duke lënë pas Gjermaninë me 1,320 mjete. Në vend të tretë renditet Kina me 945 mjete, e ndjekur nga Italia me 903 dhe Zvicra me 526 mjete.
Të dhënat tregojnë një volum të konsiderueshëm hyrjesh në tregun shqiptar të automjeteve që në muajin e parë të vitit, me një prirje të qartë drejt mjeteve të importuara dhe me dominim të fortë të tregut aziatik, veçanërisht atij korean. /skyweb.al
