Personat që kryejnë procedura estetike me injeksione në fytyrë duhet të jenë të vetëdijshëm për një rrezik serioz që lidhet me bllokimin e arterieve, i cili mund të çojë në nekrozë të lëkurës apo edhe verbëri, njofton BBC. Paralajmërimi vjen pas një studimi të ri ku specialistët përdorën ultratinguj për të analizuar 100 raste të injeksioneve mbushëse që nuk kishin rezultuar siç duhej.
Tani klinikave u rekomandohet të përdorin ultratinguj para aplikimit të mbushësve dermalë, me qëllim shmangien e dëmtimit të enëve të gjakut në zonat e rrezikshme të fytyrës.
Sipas Dr. Rosa Sigrist, e cila udhëhoqi kërkimin, rastet e “bllokimit vaskular” — kur mbushësi injektohet në ose pranë një ene gjaku — janë të rralla, por potencialisht shkatërruese. Nëse nuk trajtohen me kohë, ato mund të shkaktojnë vdekje të indeve dhe deformime të fytyrës.
Mbushësit dermalë përdoren zakonisht për reduktimin e rrudhave dhe rinovimin e lëkurës, si dhe për formësimin e hundës apo buzëve. Megjithatë, Dr. Sigrist thekson se zona rreth hundës është veçanërisht e ndjeshme, pasi enët e gjakut aty komunikojnë me struktura thelbësore të kokës. Dëmtimi i tyre mund të çojë në pasoja të rënda, përfshirë dëmtim të lëkurës, verbëri ose madje goditje në tru.
Studimi, i kryer në qendra të specializuara në Brazil, Kolumbi, Kili, Holandë dhe SHBA midis majit 2022 dhe prillit 2025, zbuloi se pothuajse gjysma e pacientëve kishin mungesë të rrjedhjes së gjakut në enët e vogla që lidhin arteriet sipërfaqësore me ato më të thella. Në një të tretën e rasteve u vu re mungesë rrjedhjeje edhe në arteriet kryesore.
Ekspertët rekomandojnë përdorimin e ultratingullit si para injektimit, ashtu edhe në rast komplikimesh, për të identifikuar saktë zonën e bllokimit dhe për të udhëhequr trajtimin. Sipas Dr. Sigrist, kjo qasje mundëson përdorimin e saktë dhe më të reduktuar të hialuronidazës, duke përmirësuar rezultatet e trajtimit.
Shoqata Britanike e Kirurgëve Plastikë Estetikë (BAAPS) njofton se, megjithëse ultratingulli po përdoret gjithnjë e më shumë në procedurat estetike, ai ende nuk konsiderohet standard i detyrueshëm. Sipas presidenteve të BAAPS, Nora Nugent, teknologjia po dëshmon vlerën e saj në identifikimin e enëve të gjakut para procedurave.
Ndërkohë, qeveria britanike po përgatit rregulla të reja, të cilat do të kufizojnë kryerjen e procedurave më të rrezikshme vetëm tek profesionistët shëndetësorë të kualifikuar.
