Udhëtarët që hyjnë në Bashkimin Europian mund të përballen sërish me pritje të gjata në kufi, pas përfundimit më 6 shtator të masave fleksibile për zbatimin e sistemit të ri të hyrje-daljeve, EES.
Kompanitë ajrore i kanë kërkuar Komisionit Europian që afati të zgjatet deri në fund të vitit, por “The Guardian” raporton se disa vende anëtare mund të rikthejnë gradualisht kontrollet biometrike.
Sistemi EES kërkon regjistrimin e të dhënave biometrike, përfshirë gjurmët e gishtërinjve, për qytetarët që hyjnë në BE nga vende jashtë unionit. Zbatimi i tij ka shkaktuar shqetësime për vonesa dhe radhë të gjata në aeroporte e pika kufitare.
Përfaqësuesit e industrisë së udhëtimeve kërkojnë që Brukseli të lejojë pezullimin e kontrolleve edhe pas shtatorit, duke argumentuar se sistemi ende nuk funksionon plotësisht në të gjitha vendet pjesëmarrëse.
Probleme janë evidentuar edhe në disa pika të rëndësishme mes Britanisë së Madhe dhe Francës. Në Eurotunel, Portin e Doverit dhe terminalin Eurostar në St Pancras, pajisjet për regjistrimin biometrik ende nuk janë plotësisht funksionale. /skyweb.al
