Prokuroria e Tiranës ka regjistruar një procedim penal për evazion fiskal ndaj disa subjekteve që ofrojnë shërbime postare në kryeqytet, pas dyshimeve për tregtim mallrash pa faturë tatimore.
Burime zyrtare bëjnë me dije se, pas marrjes së autorizimit nga gjykata dhe me kërkesë të organit procedues, janë ushtruar kontrolle në disa subjekte të këtij sektori. Si rezultat i verifikimeve, janë sekuestruar sasi të konsiderueshme mallrash të marra në dorëzim pa dokumentacion tatimor, si edhe një shumë parash prej rreth 13 milionë lekësh.
Sipas Prokurorisë pranë Gjykatës së Shkallës së Parë të Juridiksionit të Përgjithshëm, Tiranë, provat e administruara deri në këtë fazë tregojnë elementë të qartë të evazionit fiskal, ndërsa shumat e parave të sekuestruara dyshohet se rrjedhin nga aktiviteti i paligjshëm.
Gjatë kontrolleve është sekuestruar edhe dokumentacion shoqërues, i cili pritet të shërbejë për zbardhjen e plotë të skemës së dyshuar dhe mënyrës së funksionimit të saj.
Hetimet vijojnë për identifikimin e shitësve realë të mallrave dhe për dokumentimin e plotë të veprimtarisë së kundërligjshme, ndërsa Prokuroria nuk përjashton zgjerimin e hetimit edhe ndaj subjekteve të tjera të përfshira në këtë aktivitet.
