Autoriteti i Konkurrencës ka goditur sot një skemë të koordinuar çmimesh në tregun e grumbullimit dhe shitjes me shumicë të fruta–perimeve, duke gjobitur gjashtë ndërmarrje që operojnë në qarqet Tiranë, Elbasan, Berat, Fier dhe Korçë.
Vendimi erdhi pas një hetimi të thelluar gati dyvjeçar, gjatë të cilit u monitoruan praktikat e tregtimit dhe u kryen analiza të detajuara të çmimeve dhe marzheve të fitimit.
Komisioni i Konkurrencës konstatoi se Omer Fruit SHPK, Nedrete Arapi (PF), Besim Thaqi (PF), Morina Grup SHPK, Fruit-To-Zela SHPK dhe Roland-2012 SHPK kishin bashkërenduar çmimet e blerjes së produkteve gjatë sezonalitetit, duke diktuar çmimet ndaj fermerëve dhe duke aplikuar marzhe fitimi të pajustifikuara, që në disa raste arrinin deri në 115 për qind.
Autoriteti e cilësoi këtë sjellje si marrëveshje të ndaluar dhe shkelje të rëndë të ligjit për konkurrencën, duke vendosur gjoba që arrijnë deri në 0.15 për qind të xhiros vjetore.
Gjetjet e hetimit treguan se disa grumbullues, falë fuqisë së tyre në treg, krijonin situata ku fermerët nuk kishin mundësi negociimi. Ata përballeshin me çmime të diktuara, varësi nga pak blerës, presione për ulje çmimesh dhe shlyerje të vonuara, një realitet që deformonte konkurrencën dhe dëmtonte prodhuesit vendas.
Autoriteti i Konkurrencës thekson se vendimi përbën një ndërhyrje strukturore me impakt të drejtpërdrejtë në zinxhirin ushqimor, duke synuar të forcojë pozitat e fermerëve dhe të krijojë kushte më të drejta tregu. Sipas institucionit, efekti i vendimit shtrihet në gjithë tregun kombëtar, pasi vendos standarde të qarta për transparencën e çmimeve dhe disiplinimin e praktikave të grumbulluesve.
Komisioni ka urdhëruar gjithashtu ndërmarrjet e gjobitura që të afishojnë çmimet aktuale të produkteve që grumbullojnë dhe të jenë nën monitorim për një vit. Kjo masë ka për qëllim të rrisë transparencën dhe të garantojë sjellje më të ndershme në treg.
Paralelisht, Autoriteti i Konkurrencës ka adresuar një paketë rekomandimesh për Ministrinë e Financave dhe Ministrinë e Bujqësisë, ku përfshihen reduktimi i informalitetit në zinxhirin e tregtimit, krijimi i një kuadri të ri ligjor sipas standardeve të BE-së, ngritja e një platforme kombëtare online të çmimeve (bursë agro-ushqimore), vendosja e kontratave të detyrueshme dhe transpozimi i Direktivës së BE-së për praktikat tregtare të padrejta.
Sipas Autoritetit, këto masa janë të nevojshme për të garantuar një treg më të drejtë, më transparent dhe më funksional për fermerët, të cilët shpesh mbeten kategoria më e pambrojtur në zinxhirin agro–ushqimor. /skyweb.al
