Pavarësisht se Shqipëria ka dalë nga lista gri për pastrimin e parave, fenomeni mbetet shqetësues dhe i përhapur. Këtë e tregojnë edhe të dhënat e fundit të Agjencisë së Inteligjencës Financiare, ku në vitin 2024 janë identifikuar 13 skema të pastrimit të parave, kryesisht nëpërmjet pasurive të paluajtshme, automjeteve dhe bizhuterive.
Në këto skema janë përfshirë jo vetëm shtetas shqiptarë, por edhe të huaj – veçanërisht nga Ishujt Kajman dhe Afrika e Veriut. Më shumë se gjysma e skemave përfshinin biznese, ku tre shtetas të huaj kishin hapur kompani në Shqipëri dhe kishin përfituar rreth 3 milionë euro përmes transfertave që vinin nga Singapori, Rumania dhe Kolumbia. Këto fonde maskoheshin si “shërbime konsulence”.
Sipas pedagogut dhe ekspertit të ekonomisë Edison Zaçaj, “përdoren kryesisht bizneset në sektorin e shërbimeve, pasi janë më të vështirat për t’u gjurmuar”. Ai thekson se vlerat e raportuara janë vetëm maja e ajsbergut: “Në mendimin tim ka shumë më tepër raste për t’u hetuar dhe shumë më tepër vepra ende të paregjistruara”.
Të dhënat e raportit vjetor tregojnë gjithashtu një rritje të ndjeshme në “Raportet për Aktivitet të Dyshimtë” që vijnë nga bankat, pikat e këmbimit valutor dhe noterët. Gjatë vitit të shkuar, Inteligjenca Financiare i përcolli SPAK-ut dhe Policisë së Shtetit plot 234 raste të dyshuara, 14 më shumë se një vit më parë.
Për vitin 2024, vlera e parave të përfshira në këto skema dhe që u kapën nga autoritetet arriti në 10.4 milionë euro – një shifër dhjetëfish më e lartë se në vitin 2023. Sipas raportit, 97 për qind e kësaj vlere u sekuestrua me vendim të prokurorisë apo gjykatave, përqindje që ka mbetur thuajse e pandryshuar në gjashtë vitet e fundit.
Brikena Kasmi, ish-zëvendësministre e Drejtësisë, thekson se “tre elementët kryesorë të pastrimit të parave – vendosja, shtresëzimi dhe integrimi – nuk kanë ndryshuar”. Ajo shton se rritja e rasteve tregon se fenomeni vijon të jetë prezent dhe i strukturuar.
Raporti sinjalizon se Shqipëria duhet të mbetet vigjilente dhe të përforcojë më tej kapacitetet për parandalimin dhe goditjen e pastrimit të parave. /skyweb.al
