Policia e Shtetit pritet të shpenzojë rreth 28 milion euro për blerjen e uniformave dhe stemave për efektivët e Policisë së Shtetit. Tenderi është shpallur sot nga Operatori i Blerjeve të Përqëndruara dhe është ndarë në dy lote.
Sipas njoftimit, procedura është klasifikuar si “e kufizuar”, mbi kufirin e lartë monetar dhe do të zhvillohet përmes një marrëveshjeje kuadër me disa operatorë ekonomikë. Megjithatë, për secilin prej dy loteve të tenderit, do të lidhet kontratë vetëm me një operator ekonomik.
Policia, tender 6.6 milion euro për pajisje, kushtet teknike dhe tregu specifik minimizojnë garën
Objekti i kësaj kontrate është ndarë në dy lote:
- Loti I përfshin blerjen dhe shpërndarjen e uniformave, gradave, stemave dhe shenjave për Policinë e Shtetit, me një fond limit prej 1.96 miliardë lekë, ose rreth 19.8 milionë euro pa TVSH.
- Loti II përfshin blerjen dhe shpërndarjen e këpucëve, me një fond limit prej 761.9 milionë lekë, ose rreth 7.7 milionë euro pa TVSH.
Në total, fondi limit i marrëveshjes kuadër arrin në 2.72 miliardë lekë, ose 27.5 milionë euro pa përfshirë TVSH, shkruan skyweb.al.
Kjo kontratë do të ketë një kohëzgjatje prej 48 muajsh, që do të thotë se brenda katër viteve do të mundësohet furnizimi i Policisë së Shtetit me artikujt e përfshirë në dy lotet e tenderit.
Procedura përmban të gjitha kushtet e përcaktuara paraprakisht dhe pritet që secili operator ekonomik të konkurojë për një lot të veçantë.
Pretendentët
Ky është një nga tenderët më të mëdhenj të këtij lloji për sektorin e rendit publik në vitet e fundit, që synon të sigurojë uniformimin dhe pajisjen bazë të efektivëve të Policisë së Shtetit për një periudhë afatgjatë.
Nisur nga fondi limit i tenderit, pritet që vëmendja të jetë e veçantë, megjithatë nisur edhe nga eksperienca e tenderëve të mëparshëm të ngjashëm, gjasat janë që Mars & Al; KOAN dhe MSSC pritet të jenë pretendentet kryesore për këtë tender. Të trija kompanitë kanë bashkëpunuar edhe për një tender tjetër të ngjashëm, atë të uniformave të OSHEE. Kompania në fjalë ishte e përfshirë edhe në tendering e mëparshëm të uniformave të policisë, i cili u shoqërua edhe me një skandal duke përfunduar në arrestime të bujshme.
Më herët, policia shpalli një tjetër tender me vlerë rreth 6.6 milion euro për pajisje, për të cilin raportoi Skyweb.al. /skyweb.al
