Kur nisi procesi i regjistrimit të qytetarëve shqiptarë me banim jashtë vendit për të votuar në zgjedhjet e 2025-ës, Komisioni Qendror i Zgjedhjeve u zotua qartë: qytetarët nuk do të kishin nevojë të shkonin në zyrat postare për të marrë ose dorëzuar zarfet.
Gjithçka do të kryhej në adresat që vetë qytetarët kishin deklaruar, përmes një shërbimi postar “derë më derë”.
Por sot, më 3 maj 2025, në një kthesë të papritur, KQZ u bën thirrje votuesve shqiptarë që ndodhen në Greqi që të paraqiten fizikisht në pikat e DHL për të tërhequr ose dorëzuar zarfet e votimit.
Situata me votuesit në Greqi është shumë problematike. Në Greqi janë dërguar mbi 68 mijë zarfe dhe deri më tani janë kthyer vetëm 7.2% e tyre, shkruan skyweb.al.
Lista e zyrave dhe oraret e punës u publikua nga kreu i KQZ, Ilirjan Celibashi si një njoftim i thjeshtë, por pas tij fshihet një realitet shumë shqetësues që vë në pikëpyetje jo vetëm standardin e procesit, por edhe vetë legjitimitetin e tij.
Në një kohë kur procesi duhej të ishte i sigurt dhe pa ndikime, kërkesa për qytetarët që të shkojnë vetë në zyrat e DHL jo vetëm krijon pengesa të reja praktike, por edhe hap derën për ndërhyrje dhe manipulime.
Kujtojmë se DHL ka marrë nga shteti shqiptar një kontratë në vlerën 9.2 milionë euro, pikërisht për të garantuar një shërbim korrekt dhe për të respektuar të drejtën kushtetuese të zgjedhësve jashtë vendit.
Ajo që po ndodh sot tregon se ky detyrim nuk është përmbushur.
Statistikat e zarfeve:
- 245,935 zarfe janë dërguar nga KQZ drejt zgjedhësve jashtë vendit.
- 219,464 zarfe janë marrë nga zgjedhësit (pra, 26,471 zarfe nuk janë marrë kurrë, janë të humbur ose bllokuar që në nisje).
- Nga zarfe të marra, vetëm 131,657 zarfe kanë mbërritur në Komisionin Qendror të Zgjedhjeve.
- Kjo do të thotë se 87,807 zarfe janë marrë nga qytetarët, por nuk kanë arritur në destinacion.
Në total, 114,278 zarfe janë aktualisht të humbura ose të bllokuara:
- një pjesë (26,471) që asnjëherë nuk arriti në duart e zgjedhësve,
- dhe një pjesë tjetër (87,807) që janë “zhdukur” pas marrjes, diku në itinerarët postare ose në dorëzime që nuk u bënë kurrë.
Çfarë do të thotë kjo në praktikë?
Kemi përballë një shifër alarmante: mbi 46% e të gjithë zarfave të dërguar janë jashtë çdo kontrolli. Në një proces votimi, ku besueshmëria ndërtohet mbi parimin e integritetit të çdo vote, mungesa e qindra mijëra zarfeve është një skandal më vete.
Nëse marrim parasysh se një pjesë e mirë e këtyre zgjedhësve kanë bërë sakrifica për t’u regjistruar dhe për të votuar nga mijëra kilometra larg, fakti që zarfet nuk u dërguan apo nuk u kthyen përbën një cënim të drejtës së tyre përfaqësuese.
Pse është ky një problem serioz ?
Së pari, për shkak të mungesës së transparencës. Deri tani, KQZ nuk ka sqaruar nëse këto zarfe të humbura janë përgjegjësi e postës DHL apo janë rezultat i ndonjë problemi tjetër logjistik.
Së dyti, sepse ndryshimi i procedurave në mes të procesit hap rrugën për abuzime. Nëse fillimisht thuhej që zarfi do të vinte në shtëpi, sot qytetarët duhet të shkojnë vetë në poste, një akt që mund të rezultojë në mosmarrjen e zarfeve nga të gjithë votuesit, në vonesa, ose në probleme të tjera me dorëzimin.
Së treti, sepse një numër kaq i madh zarfesh të humbur potencialisht mund të ndikojë rezultatin zgjedhor në një ose më shumë qarqe, duke deformuar vullnetin e qytetarëve që ndodhen jashtë Shqipërisë.
Prandaj, procesi i votimit të shqiptarëve jashtë vendit rrezikon të bëhet një farsë e kushtueshme dhe një dështim historik për demokracinë shqiptare. /skyweb.al
