Kompania shqiptare “Kappa Oil” ishte pjesë e panairit më të rëndësishëm ndërkombëtar për industrinë automobilistike, “Autopromotec 2025”, i mbajtur në Bolonja të Italisë nga 21 deri më 24 maj. Me afro 98 mijë pjesëmarrës nga 130 vende, ky edicion i 30-të shënoi një rekord të ri dhe u konfirmua si një ngjarje qendrore për sektorin.
E themeluar në Shqipëri në vitin 1992 nga z. Krenar Lasko, “Kappa Oil” ishte një nga kompanitë përfaqësuese shqiptare në këtë panair, me stendën e saj që tërhoqi vëmendjen e qindra vizitorëve çdo ditë. Si kompania e parë në vend për vajra lubrifikantë dhe aksesorë automjetesh, “Kappa Oil” është tashmë një emër i njohur me eksperiencë 33-vjeçare dhe bashkëpunime të zgjeruara në tregje ndërkombëtare.
Presidenti i kompanisë, Krenar Lasko, deklaroi se pjesëmarrja në panaire si Autopromotec është thelbësore për zhvillimin dhe hapjen e tregjeve të reja: “Përmes këtyre eventeve kemi lidhur kontrata të rëndësishme në Angli, Portugali, Slloveni, Itali, Bjellorusi, Marok dhe Egjipt. 87 për qind e prodhimit të kompanisë sonë në sektorin e tapeteve dhe moketeve eksportohet jashtë Shqipërisë.”
Sipas organizatorëve të panairit, “Autopromotec 2025” regjistroi 97,348 pjesëmarrës gjatë katër ditëve të zhvillimit, me një mesatare ditore prej mbi 24 mijë vizitorësh profesionistë. Përfaqësimi ndërkombëtar ishte i lartë, me 1692 kompani nga 46 vende, ku 49 për qind ishin të huaja.
Krahas ekspozimit të produkteve, panairi përfshiu edhe forume dhe diskutime mbi të ardhmen e industrisë, me fokus te qëndrueshmëria, dixhitalizimi dhe risitë teknologjike. Organizatorët njoftuan se panairi mori certifikatën ISO 20121 për menaxhimin e qëndrueshëm të eventit, duke reflektuar përkushtimin për standarde të larta mjedisore dhe sociale.
Pas këtij suksesi, edicioni i ardhshëm i panairit “Autopromotec” është parashikuar të mbahet në vitin 2027. “Kappa Oil” ka paralajmëruar tashmë pjesëmarrjen e saj, me objektivin për të rritur më tej praninë dhe ndikimin e saj në tregun global të produkteve automobilistike. /skyweb.al
