Këshilli i Ministrave ka miratuar kushtet e negocimit për shoqërinë shtetërore “KAYO” sh.a., e cila do të krijojë një shoqëri aksionare të përbashkët me investitorë privatë për prodhimin dhe tregtimin e municioneve të kalibrave të vegjël dhe të mesëm.
Sipas vendimit të miratuar, bashkëpunimi do të zhvillohet në përputhje me legjislacionin shqiptar për shoqëritë tregtare, me qëllim krijimin e një strukture prodhuese që do të fuqizojë kapacitetet vendase në industrinë ushtarake.
“KAYO” sh.a. do të mbajë jo më pak se 20% të aksioneve në shoqërinë e përbashkët dhe do të kontribuojë me një sipërfaqe prej të paktën 20,000 m² pasuri të paluajtshme, që do t’i vihet në dispozicion entitetit të ri pa të drejtë tjetërsimi.
Ndër kushtet kryesore të negociimit me subjektet private përfshihen:
- Një investim minimal prej 60 milionë euro në një periudhë 3-vjeçare.
- Punësimi i të paktën 80 punonjësve brenda të njëjtit afat.
- Ofrimi i linjave teknologjike për prodhimin e municioneve të përshtatshme me nevojat e Forcave të Armatosura dhe strukturave të tjera të sigurisë në vend.
- Sigurimi i rrjetit të shpërndarjes për eksportin e municioneve.
Kjo nismë synon të ringjallë industrinë ushtarake shqiptare dhe të krijojë një model bashkëpunimi publik-privat në një sektor me rëndësi strategjike për mbrojtjen dhe ekonominë e vendit./skyweb.al
