Ministria e Infrastrukturës dhe Energjisë ka vendosur të anulojë procedurën për dhënien me koncesion të ndërtimit të autostradës Milot–Balldrenë, një segment kyç i Korridorit Adriatiko-Jonian.
Sipas njoftimit të publikuar në buletinin e Agjencisë së Prokurimeve Publike, procedura u anuluar për shkak se asnjë nga ofertat e paraqitura nuk përmbushi kushtet e kërkuara. Operatorët ekonomikë janë njoftuar për këtë vendim më 19 qershor.
Ftesa për koncesion u shpall në dhjetor të vitit të kaluar dhe procedura përfundoi më 10 mars, me katër kompani pjesëmarrëse: Gener 2, Salillari, A.N.K dhe 4 A-M. Pas disa muajsh shqyrtim, ministrja Belinda Balluku vendosi ta anulojë garën, duke e rikthyer projektin në pikën zero.
Segmenti Milot–Balldrenë, me gjatësi rreth 17 kilometra, është pjesë e asaj që konsiderohet si “Korridori Blu” dhe do të lidhë Milotin me rrugën Tiranë–Shkodër në Balldrenë, duke përmirësuar ndjeshëm lëvizjen drejt plazheve veriore dhe portit të Shëngjinit. Rruga ekzistuese, që kalon nëpër qytetin e Lezhës, vuan nga trafik i rënduar dhe kohë të gjata udhëtimi, sidomos gjatë sezonit turistik.
Autostrada e re ishte konceptuar si një rrugë e kategorisë “A” me dy korsi për secilin drejtim, tunel me dy tuba, vepra arti mbi lumenjtë Mat dhe Drin, dhe sisteme të automatizuara për tarifimin dhe menaxhimin e trafikut.
Kjo është përpjekja e dytë e dështuar për të ndërtuar këtë aks përmes koncesionit. E para ndodhi në vitin 2018, kur qeveria kishte shpallur fituese kompaninë A.N.K përmes modelit të Partneritetit Publik Privat (PPP), ku kompania do të ndërtonte rrugën me fondet e saj dhe do të shlyhej nga buxheti i shtetit në një periudhë 13-vjeçare. Por projekti dështoi pasi kompania nuk siguroi financimin e nevojshëm.
Në përpjekjen e dytë, qeveria ndryshoi modelin, duke kaluar në një skemë koncesioni me tarifë kalimi për qytetarët dhe një kontratë 35-vjeçare. Sipas projektit, investimi i privatit përfshinte 182.5 milionë euro për ndërtimin dhe 365 milionë euro në total për gjithë periudhën. Por edhe kjo tentativë nuk u finalizua.
Anulimi i procedurës e lë sërish të pasigurt fatin e këtij segmenti strategjik për infrastrukturën rrugore në veri të vendit. Deri tani, Ministria e Infrastrukturës nuk ka bërë të ditur nëse do të rihapë një tjetër tender apo do të ndryshojë qasjen për ndërtimin e autostradës Milot–Balldrenë.
Ndërkohë, qarkullimi në këtë segment vijon të mbetet i ngarkuar, veçanërisht gjatë muajve të verës, duke nxjerrë në pah nevojën urgjente për ndërhyrje në infrastrukturë. /skyweb.al
