Kompania ajrore me kosto të ulët, Wizz Air, do të mbyllë operacionet e saj në Abu Dhabi duke nisur nga muaji shtator 2025.
Vendimi shënon fundin e një eksperience që zgjati disa vite në kryeqytetin e Emirateve të Bashkuara Arabe, ku aktualisht operojnë 12 avionë Airbus A321 në Aeroportin Ndërkombëtar Zayed, me rreth 30 destinacione në Lindjen e Mesme, Afrikë, Azi Qendrore dhe Evropë.
Sipas drejtorit ekzekutiv të Wizz Air, József Váradi, kompania do të përqendrohet sërish te tregjet e saj tradicionale në Evropën Qendrore dhe Lindore, që ai i cilësoi si “thelbi” i operacioneve të linjës ajrore.
“Kemi ulur investimet në këtë treg gjatë viteve të fundit dhe tani është koha të rikthehemi me vëmendje të plotë,” deklaroi ai.
Megjithëse filiali i Abu Dhabit u lançua si një sipërmarrje e përbashkët me Abu Dhabi Developmental Holding Company, modeli i biznesit nuk rezultoi fitimprurës.
Tre janë arsyet kryesore që sollën këtë vendim:
- Kushtet klimatike ekstreme të rajonit përshpejtonin amortizimin e motorëve, duke rritur kostot e mirëmbajtjes dhe ulur efikasitetin operacional;
- Wizz Air nuk pati akses në tregjet indiane dhe pakistaneze, siç i ishte premtuar në fillim;
- Tensionet rajonale dhe mbylljet e herëpashershme të hapësirës ajrore e bënë më të vështirë ruajtjen e qëndrueshmërisë financiare.
Një eksperiment që nuk funksionoi
Hapja e Wizz Air Abu Dhabi ndodhi pak pas startit të Air Arabia Abu Dhabi, një tjetër linjë me kosto të ulët, gjithashtu një sipërmarrje e përbashkët me Etihad.
Por Abu Dhabi, që nuk ka një treg të madh origjine-destinacioni, nuk arriti të mbështesë dy modele të ngjashme operimi, të orientuara kryesisht drejt transportit të punëtorëve emigrantë.
Linja ajrore, dikur ndër më premtueset në Evropë, po përballet me sfida serioze.
Ndërsa Ryanair ka parë rritje mbi 100% në bursë gjatë pesë viteve të fundit, aksionet e Wizz Air kanë rënë me mbi 60%.
Kompania ka fajësuar problemet me motorët Pratt & Whitney të flotës së saj Airbus A320, por problemet duket se shtrihen përtej aspektit teknik.
Modeli i linjave ultra low cost varet nga rritja e vazhdueshme, kosto të ulëta të punës dhe efikasiteti në operim, faktorë që u sfiduan rëndë në Abu Dhabi.
Ndryshe nga SHBA, ku konkurrenca me linjat tradicionale dhe rritja e kostove ka vështirësuar modelin low cost, Evropa ende mbetet më e favorshme, por vetëm për ata që dinë të përqendrohen.
Vendimi për t’u tërhequr nga Lindja e Mesme sinjalizon një rikthim te baza për kompaninë, që synon të forcojë praninë e saj në tregjet evropiane.
Se sa e suksesshme do të jetë kjo strategji mbetet për t’u parë, ndërkohë që riorganizimi i flotës dhe rrugëve është në fokusin e menaxherëve./skyweb.al
