Këshilli Bashkiak i Vlorës nuk do të shqyrtojë nesër projektvendimin për dhënien me qira të mbi 830 hektarëve tokë në zonën e Kaninës, ku ishte parashikuar ndërtimi i një parku të madh fotovoltaik.
Lajmi u konfirmua zyrtarisht nga kryetarja e Këshillit, Elpiniqi Mërkuri, përmes një njoftimi publik, duke shënuar tërheqjen nga një proces që kishte ngjallur reagime të forta publike dhe politike.
“Mbledhja e nesërme e Këshillit Bashkiak nuk do të përfshijë shqyrtimin e kësaj çështjeje,” deklaroi Mërkuri, duke theksuar se nga verifikimi i fundit në Kadastër rezulton se Bashkia e Vlorës nuk është zotëruese e titullit të pronësisë për truallin në fjalë, pavarësisht se disponon një vërtetim si truall në emër të saj.
Kjo tërheqje vjen pas një serie lajmesh investigative dhe denoncimesh publike, ku më i rëndësishmi ishte publikimi i gazetarit Klodian Tonorri, që hodhi dritë mbi gjithë prapaskenat politike dhe ekonomike të këtij procesi.
Sipas shkrimit të Kapitalit, ideja për ndërtimin e një parku diellor në Malin e Kaninës u paraqit për herë të parë në nëntor të vitit të kaluar, me një projekt që synonte të shtrihej në 830 hektarë në zonën kullosore Shashicë–Gumenicë, ku sot zhvillojnë aktivitetin e tyre qindra familje blegtorale.
Banorët, të mbledhur në një dëgjesë publike, e refuzuan prerazi projektin, duke paralajmëruar shkatërrimin e ekonomive të tyre tradicionale.
Në përpjekje për ta shtyrë vendimmarrjen, kryetari i Bashkisë Ermal Dredha kishte organizuar disa procedura paraprake, por përballë presionit të fortë që vinte nga Tirana, përfshirë përplasjet e tensionuara me kryeministrin Rama dhe një ndërhyrje drastike në strukturën drejtuese të bashkisë, projektvendimi u firmos dhe iu dërgua Këshillit për votim më 21 korrik.
Përmes dokumenteve zyrtare rezulton se propozimi parashikonte dhënien në përdorim për 10 vjet, me të drejtë rinovimi, të sipërfaqes kullosore, me qëllim zhvillimin e një parku diellor me “kushtet e favorshme klimaterike”.
Megjithatë, paqartësia mbi titullin e pronësisë dhe mungesa e transparencës mbi kompaninë përfituese kanë ngjallur dyshime të mëdha për qëllimet e vërteta të projektit.
Për momentin, tërheqja nga rendi i ditës i çështjes së Kaninës shihet si një fitore e përkohshme për banorët dhe opinionin publik, ndërsa pritet me interes të shihet nëse projekti do të rikthehet më vonë me një formë të ndryshme apo në një mbulim tjetër ligjor./skyweb.al
