Biznesmeni Ergys Agasi është paraqitur këtë të martë në SPAK, ndërsa ende nuk dihen arsyet e thirrjes së tij në Prokurorinë e Posaçme.
Më herët në kuadër të një hetimi të nisur nga Prokuroria e Posaçme, biznesmenit më 19 qershor iu kontrollua banesa si dhe iu sekustrua telefoni celular.
Agasi konfirmoi për mediat kontrollet e ushtruar duke shpjeguar se Gjykata e Posaçme i kishte miratuar pas dyshimeve bazuar në indicie të arsyeshme që prokuroria kishte ngritur për implikimin e tij në kontrabandën e cigareve, lidhur me fabrikën e zbuluar në Librazhd.
“Në mëngjes më kanë ardhur agjentët dhe më është bërë me dije se ishin miratuar kontrolle në bizneset e mia, për shkak të një hetimi që lidhej me kontrabandën e cigareve. Kam qenë i gatshëm të bashkëpunoj pa asnjë hezitim.” – tha Agasi.
Kompania publikoi një vit më parë një bilanc që do ta kishin zili të gjithë duke arritur një normë fitimi më shumë se 95%.
Agasi rezulton të jetë blerësi i kompanisë së cigareve “Albania Tabak” vetëm pak ditë para operacionit të mad të SPAK kundër kontrabandës së cigareve. Rezulton se ndryshimet në QKB, ku kompania ka kaluar në pronësi të z. Agasi, janë reflektuar më datë 27 maj 2025, vetëm një ditë para se SPAK të shpallte operacionin.
Në një deklarim për mediat ai theksoi se kishin qenë pronarët e fabrikës që ia ofruan atij atë për shitje dhe jo e kundërta. /skyweb.al
