Ministria e Infrastrukturës dhe Energjisë ka rihapur garën për ndërtimin me koncesion të autostradës Milot-Balldre, me një vlerë prej 364,7 milionë euro pa TVSH. Kompanitë e interesuara kanë afat deri më 2 tetor për të dorëzuar ofertat.
Kjo është hera e dytë që shpallet tenderi, pasi procesi i mëparshëm u anulua një muaj më parë për shkak se asnjë ofertë nuk u kualifikua.
Projekti parashikon ndërtimin e një rruge të re me gjatësi 17 kilometra, e cila sipas planit duhet të përfundojë brenda vitit 2028.
Historia e këtij koncesioni ka nisur në vitin 2018, me një propozim të pakërkuar, por deri më sot projekti ka mbetur vetëm në fazë tenderimi. Trasa e autostradës do të nisë nga nyja e Milotit, duke u lidhur me segmentet Milot-Thumanë-Kashar-Lekaj dhe Rrugën e Kombit, për të përfunduar në Balldre, ku do të bashkohet me rrugën ekzistuese Tiranë–Shkodër./skyweb.al
