Ceremonia u hap me ekzekutimin e Himnit Kombëtar dhe vijoi me leximin e dekretit presidencial, bazuar në Kushtetutë dhe ligjin “Për pushtetet dhe autoritetet e drejtimit e të komandimit të Forcave të Armatosura”. Pas leximit të dekretit, gjeneral Kingji bëri betimin me dorën mbi Kushtetutë.
Në aktivitet morën pjesë Ministri i Mbrojtjes, Pirro Vengu, Zëvendësshefi i Shtabit të Përgjithshëm, komandantët e forcave dhe drejtues të strukturave të tjera të FA-së.
Gjenerallejtënant Arben Kingji ka lindur në Kukës, më 22 dhjetor 1970. Ka mbaruar Akademinë Ushtarake “Skënderbej” dhe karrierën e nisi si komandant toge në Repartin Ushtarak 9001. Është trajnuar në Turqi, ku ka kryer Kursin Bazë Komando (1993) dhe Kursin Bazë të Forcave Speciale (1999). Në vijim, ka mbajtur poste të rëndësishme si komandant i Batalionit të Policisë Ushtarake, atashe ushtarak në Rumani, komandant i Batalionit III në Forcën Tokësore dhe komandant i Forcës Tokësore (2020-2022). Më 2 gusht 2022 mori detyrën e Shefit të Shtabit të Përgjithshëm, ndërsa më 27 nëntor 2024 u promovua në gradën gjeneral lejtnant.
Kingji ka marrë pjesë në katër misione jashtë vendit – tre në Afganistan dhe një në Irak – gjithmonë si komandant kontingjenti. Është vlerësuar me një sërë medaljesh nga Shqipëria, SHBA dhe NATO, përfshirë Medaljen e Artë të Shqiponjës në vitin 2003. Ai flet anglisht dhe turqisht, është i martuar dhe ka dy fëmijë./skyweb.al
