Numri i nxënësve të regjistruar në shkollat e mesme profesionale gjatë vitit shkollor 2024-2025 ka shënuar një rritje me rreth 500 nxënës, duke përmbysur tendencën e viteve të fundit ku regjistrimet kishin qenë në rënie të vazhdueshme.
Edhe pse nuk ka një shpjegim zyrtar për këtë ndryshim, ekspertët mendojnë se orientimi i të rinjve drejt arsimit profesional lidhet me realitetin e tregut të punës.
Shumë degë universitare prodhojnë të diplomuar pa perspektivë punësimi, ndërkohë që sektorë si ndërtimi dhe turizmi janë në zgjerim të ndjeshëm dhe po kërkojnë gjithnjë e më shumë fuqi punëtore të kualifikuar.
Emigrimi masiv i profesionistëve si elektricistë e hidraulikë, si edhe rritja e kërkesës për punonjës të kualifikuar në shërbimet akomoduese e turistike, duket se kanë nxitur më shumë të rinj të zgjedhin shkollat profesionale në vend të universiteteve, raporton skyweb.al.
Të dhënat e INSTAT tregojnë se në vitin shkollor 2024-2025, në arsimin e mesëm të lartë (gjimnaz dhe profesional) janë regjistruar gjithsej 89.190 nxënës, ndërsa në arsimin parauniversitar numri total i regjistrimeve ka rënë me 2.6 për qind krahasuar me një vit më parë.
Në arsimin e lartë janë regjistruar 122.613 studentë, me një rritje të lehtë prej 2.1 për qind, por programet e “Bachelor” kanë pësuar rënie me 0.8 për qind. Degët më të preferuara mbeten Biznesi, administrimi dhe ligji, ndjekur nga Shëndetidhe Inxhinieria.
Ky ndryshim në orientimin e të rinjve mund të jetë një sinjal se tregu i punës po ndikon drejtpërdrejt në zgjedhjet arsimore, duke e kthyer arsimin profesional në një alternativë gjithnjë e më tërheqëse. /skyweb.al
