Instituti i Sigurimeve Shoqërore ka njoftuar se pensionistët mund të zgjedhin ta marrin pensionin e tyre përmes një llogarie bankare, duke shmangur radhët në sportelet e postës dhe vonesat në pagesa.
Për ta realizuar këtë, pensionisti duhet të paraqitet pranë një banke të nivelit të dytë me të cilën ISSH ka marrëveshje bashkëpunimi dhe të hapë një llogari pa komision, të dedikuar vetëm për marrjen e pensionit.
Llogaria nuk ka tarifa mirëmbajtjeje dhe nuk ka kosto për tërheqje apo shërbime bazë.
Pasi hapet llogaria, banka njofton ISSH-në dhe ndjek procedurën për transferimin e qendrës paguese.
Brenda tri ditëve pune përpunohet kërkesa, ndërsa brenda pesë ditëve të tjera përfundon regjistrimi elektronik, duke bërë që pensioni të kalojë në llogari rreth datës 20 të çdo muaji.
Pensionistët që zgjedhin këtë formë duhet të konfirmojnë dy herë në vit, në mars dhe shtator, dëshirën për të vazhduar marrjen e pensionit në bankë, e cila përkthehet ndryshe edhe si konfirmim që jeton.
Ky konfirmim, i quajtur “deklaratë për vazhdimin e kreditimit”, mund të bëhet në portalin “e-Albania” ose në sportelin e bankës.
Mosdeklarimi në kohë sjell ndërprerjen e përkohshme të pagesës në bankë dhe kthimin e saj në pikën e mëparshme të tërheqjes.
Kjo mënyrë e re ofron më shumë siguri, kursen kohë dhe përpjekje fizike për pensionistët.
Sipas ISSH-së, mijëra të moshuar tashmë e kanë zgjedhur këtë opsion dhe numri i aplikimeve është në rritje.
Për çdo paqartësi, asistenca ofrohet nga zyrat e ISSH-së, bankat dhe portali “e-Albania”./skyweb.al
