Vendet në mbarë botën po mirëpresin Vitin e Ri teksa ora shënon mesnatën në zona të ndryshme kohore, raporton BBC.
Ishulli Kiritimati, një atol në Paqësorin e largët që i përket shtetit të Kiribatit, u bë vendi i parë në botë që hyri në vitin 2026. Një turist që ndodhej atje tregoi se e festoi ndërrimin e viteve “në një plazh pa satelitë, pa shenja jete njerëzore, në errësirë të plotë dhe mes gaforreve të panumërta”.
Pas tij, Zelanda e Re priti Vitin e Ri me fishekzjarre në Auckland, ndërsa Australia ndriçoi qiellin mbi Operan e Sidneit dhe Urën e Portit të Sidneit. Megjithatë, festimet në Sydney u shoqëruan edhe me momente reflektimi dhe trishtimi, pasi vendi përkujtoi sulmin e ndodhur më 14 dhjetor në Bondi Beach, ku humbën jetën 15 persona.
Në orën 23:00 sipas kohës lokale, Porti i Sidneit u zhyt në heshtje për një minutë, ndërsa turmat ndezën drita për të nderuar viktimat. Një menorah hebraike u projektua mbi shtyllat e Urës së Portit, si simbol kujtese dhe solidariteti.
Në pjesë të tjera të botës, Vitit të Ri iu dha mirëseardhja sipas traditave lokale. Në plazhin nudist të Le Cap d’Agde, në jug të Francës, festues të veshur dhe të zhveshur morën pjesë në zhytjen tradicionale në det për të shënuar fillimin e vitit të ri.
Ndërkohë, në qytetin Ommen në Holandë, banorët ndoqën traditën vjetore të “qitjes me karabit”, ku kanaçet e qumështit shndërrohen në topa artizanalë për të festuar natën e Vitit të Ri. /skyweb.al
