Ekonomia shqiptare ka hyrë në vitin 2025 me ritme pozitive zhvillimi, duke shënuar një rritje prej 3.4% në tremujorin e parë, e mbështetur nga të gjithë komponentët e kërkesës, konsum privat e publik, investime dhe eksport mallrash e shërbimesh.
Të dhënat dalin nga raporti i fundit i politikës monetare i Bankës së Shqipërisë, i cili pasqyron një tablo të qëndrueshme ekonomike, ku tregu i punës, rritja e pagave dhe inflacioni i ulët po forcojnë fuqinë blerëse të qytetarëve.
Sipas BSH, në sektorin privat, punësimi është zgjeruar ndjeshëm, ndërsa papunësia ka rënë në 8.7%, nga 9.6% që ishte një vit më parë.
Paralelisht, paga mesatare ka shënuar një rritje të fortë prej 9.6%, duke reflektuar kërkesën e lartë për punëtorë dhe kushtet e përmirësuara në tregun e punës.
Sipas Bankës së Shqipërisë, këto zhvillime, të kombinuara me nivelin e ulët të inflacionit, kanë ndikuar drejtpërdrejt në rritjen e të ardhurave të familjeve shqiptare, raporton skyweb.al.
Inflacioni mbetet nën objektivin prej 3%, i ndikuar kryesisht nga rënia e çmimeve të ushqimeve dhe kursi i këmbimit të fortë të Lekut, ndërsa presionet e brendshme inflacioniste vazhdojnë të jenë të qëndrueshme. Banka vlerëson se kjo situatë ka ulur kostot e jetesës dhe ka lehtësuar presionin mbi buxhetet familjare.
Një tjetër faktor mbështetës është ambienti financiar i favorshëm. Kostot e financimit për familjet dhe bizneset mbeten të ulëta, ndërsa gatishmëria e bankave për të kredituar ekonominë është e lartë.
Kjo ka nxitur rritjen e kredisë, veçanërisht për familjet, duke mbështetur konsumin dhe investimet.
Raporti parashikon që ekonomia shqiptare do të vazhdojë të rritet pranë potencialit të saj edhe në afatin e mesëm, ndërsa inflacioni pritet të kthehet gradualisht drejt objektivit 3% deri në vitin 2026. Megjithatë, Banka e Shqipërisë paralajmëron se mjedisi i jashtëm ekonomik mbetet kompleks për shkak të ndryshimeve në tregtinë globale dhe pasigurive gjeopolitike, të cilat mund të krijojnë sfida për ecurinë ekonomike./skyweb.al
