Aeroporti i Lubjanës njoftoi se kompania shqiptare Air Albania ka anuluar planet për të nisur fluturimet midis Tiranës dhe kryeqytetit slloven, të cilat pritej të fillonin më 1 shtator.
Sipas mediave sllovene, aeroporti i Ljubjanës përmendi problemet financiare të kompanisë shqiptare si shkak për anulimin e fluturimeve.
Fluturimet shënonin rifillimin e operacioneve midis dy kryeqyteteve pas pesë vitesh. Në vitin e fundit të plotë të shërbimit, në vitin 2018, ish-transportuesi kryesor i Sllovenisë, Adria Airways, trajtoi 57,499 pasagjerë në këtë itinerar me një faktor mesatar të ngarkesës së kabinës prej 70.6%.
Problemet financiare të Air Albanias u bënë të njohura për publikun veccanërisht në fillim të këtij viti, kur një kompani e quajtur I.B.N iu drejtua Gjykatës së Shkallës së Parë në Tiranë për nxjerrjen e një urdhri sekuestroje ndaj Air Albanias.
Sipas vendimit të Gjykatës, krenaria kombëtare siç e pati quajtur kryeministri, i detyrohej kompanisë I.B.N, 4.5 milionë euro fatura të papaguara. I gjithë ky borxh ishte i provuar përmes faturave fiskale dhe i çertifikuar nga një vendim i mëparshëm gjykate në muajin tetor të vitit të kaluar.
Kompania pa bilanc që nga 2018
Gjendja financiare e Air Albania, një kompani ku 10 për qind e aksioneve zotërohen nga shteti shqiptar, mbahet e fshehtë për publikun. Bilanci i fundit i publikuar i Air Albania është ai i vitit 2018, ndërkohë që nuk dihet se me çfarë financohet kompania dhe kush janë pasojat financiare, për aksionet publike të mbajtura nga Albcontrol.
Financat e Air Albania u vunë në qendër të debateve publike, pas marrëveshjes së kompanisë me Drejtorinë e Shërbimeve Qeveritare për charterin personal të kryeministrit.
Nuk dihet se sa paguajnë shqiptarët për avionin kryeministror, që drejtoria e Shërbimeve Qeveritare ka marrë hua nga Air Albania. Opozita kërkoi ngritjen e një komisioni hetimor për këtë çështje mes disa çështjeve të tjera të nxehta, por nisma u bllokua nga maxhoranca.
