Aksidentet rrugore në vend kanë shënuar rënie të ndjeshme në fillim të vitit, sipas të dhënave të publikuara nga INSTAT, duke treguar një ulje të numrit të ngjarjeve por edhe të personave të përfshirë në to.
Në muajin janar 2026 janë regjistruar 96 aksidente rrugore në të gjithë vendin, ku 149 persona kanë mbetur të vrarë ose të plagosur. Krahasuar me janarin e vitit 2025, kur u shënuan 125 aksidente, rezulton një rënie prej 23,2 për qind, duke e bërë këtë një nga fillimet më të ulëta të viteve të fundit për sa i përket aksidenteve.
Sipas analizës së shkaqeve, 85,4 për qind e aksidenteve kanë ndodhur për shkak të sjelljes së drejtuesve të mjeteve, duke konfirmuar edhe një herë se faktori njerëzor mbetet elementi kryesor i rrezikut në rrugë. Në aspektin demografik, grup mosha 25 deri në 34 vjeç përbën pjesën më të madhe të aksidenteve, me 31,3 për qind të totalit.
Nga pikëpamja kohore, dita e premte rezulton më problematikja, me 21,9 për qind të aksidenteve të regjistruara, ndërsa dita e martë ka shënuar nivelin më të ulët, me vetëm 6,3 për qind. Po ashtu, intervali orar 19:00 deri në mesnatë rezulton më i rrezikshmi, duke përqendruar 24 për qind të aksidenteve të muajit.
Sipas shpërndarjes sipas qarqeve, Tirana vijon të ketë numrin më të lartë të aksidenteve, me 38 raste dhe 44 persona të aksidentuar, e ndjekur nga Lezha me 16 aksidente dhe 41 të aksidentuar. Në krahun tjetër, qarqe si Berati dhe Dibra paraqesin numrin më të ulët të ngjarjeve gjatë kësaj periudhe.
Të dhënat janë paraprake dhe mund të përditësohen, por trendi i muajit të parë të vitit 2026 tregon një ulje të frekuencës së aksidenteve, ndërsa sfida kryesore mbetet reduktimi i faktorëve të lidhur me sjelljen e drejtuesve në rrugë.
