Kredia për shtëpi e dhënë nga sektori bankar shqiptar ka arritur nivele rekord në gjysmën e parë të këtij viti. Sipas të dhënave të Bankës së Shqipërisë, në gjashtë muajt e parë, bankat kanë dhënë 36.2 miliardë lekë kredi të re për banesa, një rritje me 31.6% krahasuar me të njëjtën periudhë të vitit të kaluar.
Portofoli aktiv i huave për blerjen e banesave ka arritur në 230.1 miliardë lekë, duke shënuar një rritje vjetore prej 17.4%.
Aktualisht, ky portofol përbën 27% të totalit të kredive në ekonomi, raporton Monitor. Megjithatë, ekspertët vlerësojnë se rritja ka arritur pikun në mesin e vitit dhe pritet një ngadalësim pas hyrjes në fuqi të masave kufizuese të vendosura nga Banka e Shqipërisë, të cilat synojnë veçanërisht kreditë për shtëpitë e dyta apo ato me karakter investimi.
Banka Qendrore ka përcaktuar nivele tavan për dy tregues kyç: Raportin e kredisë ndaj vlerës (LTV) dhe Raportin e shërbimit të borxhit ndaj të ardhurave (DSTI). Në monedhën lekë, raporti i LTV nuk do të kalojë 85% për shtëpinë e parë dhe 80% për shtëpinë e dytë, ndërsa në valutë të huaj përkatësisht 75% dhe 70%. Sa i takon DSTI, ky do të kufizohet në 40% për shtëpinë e parë dhe 35% për të dytën në lekë, ndërsa në valutë respektivisht 35% dhe 30%.
Këto masa synojnë të kufizojnë rreziqet e mbingarkesës me borxh të individëve dhe të ruajnë stabilitetin financiar në një treg të nxehtë të pasurive të paluajtshme.
Pritet që pas implementimit të rregullave të reja, kërkesa për kredi të reja për banesa të pësojë një ngadalësim në muajt e ardhshëm.
