Një analizë e publikuar nga eksperti i sigurisë rrugore, Inxhinier Mamir Hodo ngre shqetësime serioze mbi rritjen dramatike të viktimave nga aksidentet rrugore gjatë muajit korrik.
Sipas të dhënave, në qershor 2025 u regjistruan 7 viktima, në korrik 2024 ishin 9 viktima, ndërsa në korrik 2025 numri u rrit në 22 viktima. Ky bilanc përfaqëson një rritje me 214 % krahasuar me muajin paraardhës dhe një rritje me 144 % krahasuar me të njëjtën periudhë të vitit të kaluar.
Inxhinieri Hodo nënvizon se pas këtyre shifrave qëndron një dështim i sistemit në disa hallka kyçe:
Autoshkollat, ku mungojnë standardet dhe auditimi i cilësisë së mësimdhënies.
Kontrolli rrugor, i fokusuar më shumë te gjobat fiktive sesa te menaxhimi real i trafikut.
Infrastruktura, me ndriçim të dobët, mungesë sinjalistike dhe mangësi në inxhinierinë rrugore.
Edukimi i drejtuesve të mjeteve, i cili mbetet pothuajse inekzistent pas marrjes së patentës.
“Nëse nuk vendoset një auditim i thelluar i autoshkollave dhe trajnimit të drejtuesve, nëse nuk ndalet praktika e gjobave për fasadë dhe nuk investohet në infrastrukturë, këto kolona të kuqe në grafik do të vazhdojnë të rriten muaj pas muaji,” thekson Hodo në analizën e tij. /skyweb.al
