Paraja që qarkullon në Shqipëri ka arritur nivelin më të lartë historik në muajin korrik, duke u ngjitur në 903 miliardë lekë. Sipas të dhënave të Bankës së Shqipërisë, vetëm në 3 vitet e fundit ky tregues është rritur me 15%, duke reflektuar një varësi të lartë të ekonomisë shqiptare nga përdorimi i cash-it.
Paraja në qarkullim përfshin kartëmonedhat dhe monedhat e emetuara nga Banka e Shqipërisë, të cilat përdoren nga qytetarët për pagesa të ndryshme fizike, si dhe një pjesë të fondeve të mbajtura në bankat tregtare, me përjashtim të depozitave afatgjata.
Sipas agregatit M1, që mat paranë më të lëvizshme, rritja vjetore në korrik arriti në 13.8%. Statistikat tregojnë se 50% e kësaj paraje ndodhet jashtë bankave, pra në qarkullim të lirë. Në total, jashtë sistemit bankar janë regjistruar 451 miliardë lekë (rreth 4.6 miliardë euro), një rritje me 12% krahasuar me korrikun 2024.
Edhe pse kursimet në depozita nuk përfshihen në këtë përllogaritje, të dhënat konfirmojnë se Shqipëria mbetet një ekonomi e mbështetur fuqishëm tek përdorimi i parave fizike.
Nga ana tjetër, treguesi më i gjerë M3, i cili përfshin paranë në qarkullim, llogaritë rrjedhëse, depozitat dhe instrumentet e tregtueshme, arriti në 1.8 trilionë lekë (rreth 18.4 miliardë euro). Brenda këtij totali, paraja jashtë bankave zë 24.3%.
Ky zhvillim nënvizon sfidën e madhe të ekonomisë shqiptare për të reduktuar përdorimin e lartë të cash-it dhe për të forcuar rolin e bankave në qarkullimin monetar. /skyweb.al
