Banka e Shqipërisë ka miratuar një rregullore të re që vendos kufij maksimalë për tarifat e shkëmbimit të aplikuara nga institucionet financiare për pagesat me karta bankare. Duke nisur nga 1 janari 2027, këto tarifa nuk mund të tejkalojnë 0.2% të vlerës së transaksionit për kartat e debitit dhe 0.3% për kartat e kreditit.
Vendimi synon rregullimin e kostove të transaksioneve vendase me kartë dhe krijimin e kushteve më konkurruese në tregun e pagesave elektronike.
Sipas nenit 4 të rregullores, ofruesit e shërbimeve të pagesave nuk mund të kërkojnë ose të aplikojnë tarifa shkëmbimi mbi kufijtë e përcaktuar, pavarësisht marrëveshjeve që kanë me njëri-tjetrin.
Konkretisht, për një pagesë prej 10 mijë lekësh me kartë debiti, tarifa maksimale e shkëmbimit do të jetë 20 lekë. Për të njëjtën pagesë me kartë krediti, tarifa nuk mund të jetë më e lartë se 30 lekë.
Megjithatë, këto nuk janë komisionet përfundimtare që u ngarkohen konsumatorëve apo bizneseve. Tarifa e shkëmbimit është kostoja që paguhet ndërmjet institucioneve financiare të përfshira në procesimin e transaksionit. Komisioni që një tregtar paguan për pranimin e kartave mund të përfshijë edhe kosto të tjera.
Vendosja e këtyre kufijve mund të ndikojë në uljen e kostove të pranimit të pagesave elektronike për bizneset, megjithëse rregullorja nuk garanton automatikisht uljen e komisioneve që ato paguajnë.
Një tjetër ndryshim lidhet me transparencën e tarifave. Bankat dhe institucionet që ofrojnë shërbimin e pranimit të kartave duhet t’u paraqesin tregtarëve informacion të ndarë për tarifat e shërbimit, tarifat e shkëmbimit dhe tarifat e skemave të kartave, sipas kategorive dhe markave përkatëse. Tarifat e kombinuara lejohen nëse tregtari i kërkon shprehimisht me shkrim.
Rregullorja ndalon gjithashtu vendosjen e pengesave kontraktuale që kufizojnë të drejtën e tregtarëve për të orientuar klientët drejt instrumenteve të pagesës që u kushtojnë më pak.
Po kështu, tregtarët nuk mund të detyrohen automatikisht të pranojnë të gjitha kategoritë e kartave të një skeme të caktuar, vetëm sepse pranojnë një kategori të saj, me përjashtimet e parashikuara në rregullore.
Kufijtë e rinj zbatohen për transaksionet vendase me karta të konsumatorëve, kur institucionet që ofrojnë shërbimet e pagesës për të dyja palët janë të vendosura në Shqipëri. Nga kufizimi përjashtohen, ndër të tjera, kartat tregtare të biznesit, tërheqjet e parave në bankomat apo sportel dhe transaksione të caktuara të skemave trepalëshe.
Për të shmangur anashkalimin e kufijve, rregullorja përcakton se çdo kompensim tjetër financiar me efekt të barasvlershëm me tarifën e shkëmbimit do të konsiderohet pjesë e saj.
Ofruesit e shërbimeve të pagesave detyrohen t’i raportojnë Bankës së Shqipërisë mbi zbatimin e tarifave, ndërsa institucioni mbikëqyrës mund të kërkojë edhe certifikim nga një auditor i pavarur.
Nga 1 janari 2028 do të hyjë në fuqi edhe detyrimi për t’u dhënë tregtarëve informacion mbi çdo transaksion, duke evidentuar veçmas komisionin e shërbimit dhe tarifën e shkëmbimit.
Rregullorja e re hyn në fuqi më 1 janar 2027 dhe do të zbatohet deri në anëtarësimin e Shqipërisë në Bashkimin Evropian.
















