Për dekada, Lihtenshtejni ka qenë një nga adresat më të sigurta të botës për të pasurit që kërkonin të administronin pasurinë larg syrit të publikut. Por në fund të korrikut, pikërisht elementi mbi të cilin principata ndërtoi reputacionin e saj – fshehtësia – mori një goditje të fortë.
Hakerët depërtuan për disa orë në regjistrin zyrtar ku ruhen të dhënat e pronarëve përfitues të kompanive, fondacioneve dhe strukturave të tjera juridike.
Sipas Bloomberg, sulmi preku rreth 31 mijë subjekte, ndërsa nuk ka prova se janë vjedhur para apo se është hyrë në llogari bankare.
Ajo që mund të jetë marrë, megjithatë, është po aq e ndjeshme: identiteti i personave realë që qëndrojnë pas pasurive të fshehura në struktura të ndërlikuara ligjore.
Një vilë, një portofol investimesh apo miliona euro mund të regjistrohen në emër të një kompanie, e cila kontrollohet nga një tjetër subjekt dhe në fund nga një fondacion.
Regjistri i sulmuar ishte pikërisht “çelësi” që lidhte këtë zinxhir me pronarin përfundimtar.
Lihtenshtejni është përballur edhe më parë me skandale të lidhura me fshehtësinë financiare, më i madhi prej të cilëve shpërtheu në vitin 2008 me listën e klientëve të bankës LGT.
Presioni nga SHBA-ja dhe vendet europiane e detyroi më pas principatën të rrisë transparencën dhe të forcojë rregullat kundër pastrimit të parave.
Në vitin 2015 vendi nënshkroi marrëveshje me BE-në për shkëmbimin e informacionit financiar, ndërsa nga viti 2021 kompanitë dhe fondacionet duhet të deklarojnë pronarët përfitues.
Megjithatë, këto të dhëna nuk janë publike dhe aksesohen vetëm nga autoritetet apo institucionet e autorizuara.
Në fund të vitit 2025, Lihtenshtejni kishte rreth 22,927 struktura ligjore, për një popullsi prej vetëm rreth 41 mijë banorësh.
Fondacionet mbeten një nga instrumentet më të përdorura nga familjet e pasura për të ruajtur dhe transferuar pasurinë ndër breza.
Vetë përdorimi i tyre është i ligjshëm, për sa kohë pasuritë deklarohen dhe paguhen detyrimet fiskale.
Por këtë herë hakerët nuk goditën paratë e miliarderëve; goditën pikërisht atë që Lihtenshtejni ka shitur për dekada: sekretin e tyre. /skyweb.al
