Kryeministri Edi Rama ka dhënë sinjale të qarta se qeveria mund të ndërhyjë në plazhin e Ksamilit, të cilin e quajti “plazh të dhunuar” nga operatorët privatë.
Duke e cilësuar Ksamilin një nga plazhet më të bukura të botës, Rama tha se nuk mund të mbetet më pre e atyre që e shohin si tokë për t’u pushtuar, duke vendosur çmime marramendëse dhe duke ofruar shërbim mizerabël. “Plazhi publik i Ksamilit nuk ka arsye më të jetë plazh privat”, u shpreh kryeministri, duke lënë të hapur rrugën për një model të ri administrimi, që mund të jetë edhe ndonjë licencë për investitorë strategjikë në zone.
Rama solli në vëmendje shembullin e Himarës, ku bashkia ka administruar një zonë bregdetare me standarde të rregullta shërbimi, pa abuzime me çmimet dhe pa ndotje. Ai kërkoi që edhe plazhet e tjera të mëdha si Durrësi, Shëngjini dhe Velipoja të ndjekin praktika të ngjashme, duke vendosur shërbim cilësor që justifikon çmimet.
Sinjalet e forta të dhëna nga kryeministri e bëjnë të qartë se qeveria është gati të ndryshojë rregullat e lojës për Ksamilin, duke i hequr hapësirat publike nga duart e privatëve dhe duke vendosur një model të ri menaxhimi për një nga destinacionet më të frekuentuara të turizmit shqiptar. /skyweb.al
