Tarifa e kalimit në tunelin e Llogorasë është bërë publike.
Ministrja e Infrastrukturës dhe Energjisë, Belinda Balluku, deklaroi se për autoveturat çmimi i një kalimi do të jetë 250 lekë me TVSH.
“Përmes një analize të gjerë të kostove operacionale, çmimi i një kalimi për autoveturat në tunelin e Llogorasë është 250 lekë me TVSH, as dhjetë euro, as pesë euro, as pesëdhjetë euro, se kemi dëgjuar shifra nga më të ndryshmet. Kategoritë më të mëdha si autobusët, trajlerët do të kenë çmime të posaçme, sipas studimit të fizibilitetit”, u shpreh Balluku.
Balluku njoftoi gjithashtu se janë drejt përfundimit projektet e tjera rrugore, përfshirë Qukës–Qafë Plloçë dhe një bypass 3-kilometërsh nga Bradasheshi në Lekaj, ndërsa më 3 tetor do të shpallet fituesi i kontratës për rrugën Milot–Balldren.
Në përfundim, ajo theksoi se turizmi mbetet një nga sektorët më me potencial për ekonominë shqiptare, duke u mbështetur në zhvillimin e qëndrueshëm dhe përfshirjen e komuniteteve lokale në strategjinë “Shqipëria Turistike 2030”. /skyweb.al
